قاراعاندى تۇرعىنى ايگىلى ءانشى رياننانىڭ بەينەروليكتەرىنە مونتاج جاساپ بەردى
ونىڭ جۇمىس ناتيجەسى تاپسىرىس بەرۋشى BRTHR ستۋدياسىنا عانا ەمەس، ءانشىنىڭ وزىنە دە ۇناعان، دەپ حابارلايدى قازاقپارات ءتىلشىسى.
ءادىلحان دۇيسەمبايەۆ بۇل سالاعا جاڭا كەلگەن مامان ەمەس. ول 10 جىلدان بەرى فوتو جانە ۆيدەو تۇسىرۋمەن، سونداي-اق مونتاجداۋمەن اينالىسادى. Snipes جانە Levi's سياقتى تانىمال برەندتەرمەن جۇمىس ىستەگەن. بيىل قازاقستاندىق برەيكدانسەر نيكولاي چەرنيكوۆ تۋرالى دەرەكتى فيلم ءتۇسىردى.
ريانناعا ارنالعان ۆيدەولاردى مونتاجداۋ تاپسىرىسى ءادىلحانعا شوۋ-بيزنەس جۇلدىزدارىمەن بۇرىننان جۇمىس ىستەپ كەلە جاتقان BRTHR ستۋدياسىنان كەلدى.
«مەن Savage x Fenty Show ءۇشىن پروموروليكتەرمەن جۇمىس ىستەدىم - بۇل رياننا برەندىنىڭ جىل سايىنعى ءسان كورسەتىلىمى تۋرالى ارنايى امەريكالىق تەلەۆيزيالىق شىعارىلىم. BRTHR ستۋدياسىنىڭ رەجيسسەرىنەن تاپسىرما الدىم جانە ولار بارلىق ارەكەتىمە تولىق ەركىندىك بەردى. جۇمىستى ۋاقىتىندا اياقتاۋ ءۇشىن تاڭەرتەڭنەن كەشكە دەيىن ەكى اپتا بويى، ۇيدەن شىقپاي ەڭبەك ەتتىم. بۇل ريانناعا ارنالعان ەكىنشى بەينەروليك. سونداي-اق مەن وسى جوباعا ارنالعان جارناما روليگىنىڭ مونتاجىن جاسادىم. ونىڭ قالاي شىققانىن @urbanfocus93 Instagram-پاراقشامنان كورۋگە بولادى»، - دەيدى ءادىلحان.
جاس جىگىتتىڭ بۇل سالادا ارنايى ءبىلىمى جوق. ءادىلحاننىڭ ايتۋىنشا، ول الدىمەن فوتوعا، سودان كەيىن ۆيدەو تۇسىرۋگە قىزىعۋشىلىق تانىتقان. باسقالاردىڭ نە ىستەپ جاتقانىن كوپ باقىلاپ، وسى سالاداعى اۋەسقويلارمەن جانە ماماندارمەن ارالاسا باستاعان. امەريكالىق رەپەر ScHoolboy Q-دىڭ ماسكەۋدەگى كونسەرتىنىڭ ءتۇسىرىلىمى ونىڭ كاسىبيلىگىنە سەرپىلىس اكەلگەن.
«بۇل ەكى جىل بۇرىن بولعان وقيعا. ScHoolboy Q - كۋميرىم. مەن ونىڭ كونسەرتىنە بيلەت ساتىپ الدىم جانە اككرەديتتەلمەگەن بولسام دا، تۇسىرۋگە بەل بۋدىم. ۇيىمداستىرۋشىلاردىڭ ءبىرى قاراعاندىلىق بولاتىن، ول مەنى ScHoolboy Q- مەن تانىستىردى. مۋزىكانت مۇنى كورگەندە مەنى ءوزىنىڭ ستوريزىنە شىعاردى. سول كەزدە ءبىزدى ونىڭ 5 ميلليونعا جۋىق جانكۇيەرى كوردى. سودان كەيىن كونسەرتتە تۇسىرگەن بەينەروليگىمدى Instagram-دا جاريالادىم. ول 15 مىڭعا جۋىق قارالىم جينادى. مەنىڭ ويىمشا، ولار مەنى سول كەزدە بايقادى. قازىر ينتەرنەتتىڭ كومەگىمەن بۇكىل الەمگە تانىمال بولۋعا مۇمكىندىك بار. تەك ءوز ىسىڭە سەنىپ، ونى ءسۇيۋ كەرەك»، - دەپ ەسەپتەيدى ءادىلحان.
رياننانىڭ روليكتەرىمەن جۇمىس ىستەگەننەن كەيىن قاراعاندىلىققا كوپتەگەن جاڭا ۇسىنىستار كەلىپ تۇسكەن. ول جايلى ءادىلحان ازىرگە بولىسكىسى كەلمەيتىنىن ايتادى.