پرەزيدەنت رەسەي ۇكىمەتىنىڭ توراعاسىمەن كەزدەستى
قاسىم- جومارت توقايەۆ قازاقستان مەن رەسەي اراسىنداعى ەكىجاقتى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى. ونىڭ ايتۋىنشا، ەكى ەلدىڭ قارىم- قاتىناستارى ساۋدا- ەكونوميكالىق سالادا ايتارلىقتاي جەتىستىكتەرگە جەتكەن.
«ءبىز رەسەي فەدەراتسياسىمەن اراداعى ىنتىماقتاستىقتى باعالايمىز. بۇگىنگى ساپار وتە مازمۇندى بولدى. بۇل - مەنىڭ جانە ۆلاديمير ۆلاديميروۆيچتىڭ پىكىرى. ءبىز مەنىڭ ماسكەۋگە جاساعان ساپارىمنىڭ ناتيجەسىنە كوڭىلىمىز تولاتىنىن بىلدىردىك. دەكلاراتسياعا قول قويىلدى. سونىمەن قاتار ءبىز ساۋدا- ەكونوميكالىق، ينۆەستيتسيالىق سالالارداعى ءوزارا ءىس- ارەكەتتەرىمىزدىڭ وزەكتى ماسەلەلەرىن تالقىلادىق. شەكارا ماڭى اۋداندارىنىڭ ىنتىماقتاستىق فورۋمىن اشتىق. جاڭا عانا ساۋدا- ساتتىقتىڭ باستى كورسەتكىشتەرى اتالىپ ءوتتى. شىن مانىندە، بىلتىر تاۋار اينالىمى 24,5 ميلليارد دوللاردى قۇرادى. بيىل قازىردىڭ وزىندە بۇل كورسەتكىشتەرگە قول جەتكىزىلدى. ءبىراق جىلدىڭ سوڭىنا دەيىن ءالى دە جاڭا ساندار مەن جاڭا كورسەتكىشتەر پايدا بولادى»، - دەدى مەملەكەت باسشىسى.
قاسىم- جومارت توقايەۆ ناقتى ناتيجەلەرگە قول جەتكىزۋگە باعىتتالعان بەلسەندى ءارى تابىستى جۇمىسى ءۇشىن ميحايل ميشۋستينگە العىس ايتتى. ءوز كەزەگىندە ميحايل ميشۋستين مەملەكەتتەر باسشىلارى قول جەتكىزگەن ۋاعدالاستىقتاردى ناقتى جۇزەگە اسىرۋعا دايىن ەكەنىن جەتكىزدى.
«ءسىز قازاقستان پرەزيدەنتى لاۋازىمىنا قايتا سايلانعاننان كەيىنگى العاشقى ساپارىڭىزدى رەسەي فەدەراتسياسىنا جاساعانىڭىز ماڭىزدى. بۇل رەسەيلىكتەر مەن قازاقستاندىق سەرىكتەستەر اراسىنداعى كوپ عاسىرلىق دوستىققا نەگىزدەلگەن باۋىرلاستىق، وداقتاستىق قارىم- قاتىناستىڭ ودان ءارى نىعايا تۇسەتىنىن كورسەتەدى. جاڭا عانا كرەملدە رەسەي فەدەراتسياسىنىڭ پرەزيدەنتى ۆلاديمير پۋتينمەن كەلىسسوز جۇرگىزدىڭىزدەر. سىزدەر بۇگىن ديپلوماتيالىق قارىم- قاتىناستىڭ ورناعانىنا 30 جىل تولۋىنا وراي بىرلەسكەن دەكلاراتسياعا قول قويدىڭىزدار. رەسەي مەن قازاقستاننىڭ ىنتىماقتاستىعىن نىعايتۋ جونىندە ستراتەگيالىق شەشىمدەر قابىلداندى. ءبىزدىڭ، ياعني ەكى ەل ۇكىمەتتەرىنىڭ الدىندا پرەزيدەنتتەرىمىز كەلىسكەن ۋاعدالاستىقتاردى جۇزەگە اسىرۋ مىندەتى تۇر»، - دەدى رەسەي ۇكىمەتىنىڭ ءتوراعاسى.