توقايەۆ قازاقستان مەن رەسەيدىڭ شەكارالاس اۋماقتارىن دامىتۋعا قاتىستى ايتتى
بۇل تۋرالى قازاقستان مەن رەسەيدىڭ ءوڭىرارالىق ىنتىماقتاستىق فورۋمىنىڭ XVIII جالپى وتىرىسىنا قاتىسۋشىلارعا ۆيدەوكونفەرەنسيا رەجيمىندە ءسوز ارناعان مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«قازاقستان تۇراقتى ساۋدا، ينۆەستيتسيالىق قاتىناستاردى دامىتۋعا مۇددەلى. شەكارالاس اۋماقتارىمىزدا اۆتوموبيل جولدارىن سالۋ، لوگيستيكالىق حابتار مەن ەكونوميكالىق ايماقتار قۇرۋ باسىمدىق سانالادى. 2019-جىلى س ق و- دا «قىزىلجار» ارناۋلى ەكونوميكالىق ايماعى قۇرىلدى. جاقىن ارادا ول جەردە ەكسپورتقا باعدارلانعان زاماناۋي وندىرىستەر پايدا بولادى. وسى ارناۋلى ەكونوميكالىق ايماقتىڭ قىزمەتى ەكى ەلدىڭ شەكارالاس اۋماقتارىنىڭ كووپەراتسياسىنا جاقسى سەرپىن بەرە الادى دەپ سانايمىن»، - دەدى قاسىم-جومارت توقايەۆ.
مەملەكەت باسشىسى جوعارى قايتا ءبولۋ ونىمدەرىن وندىرۋدەگى ىنتىماقتاستىقتى كەڭەيتۋ تاعى ءبىر باسىمدىق ەكەندىگىنە نازار اۋدارتتى.
«پاۆلودار، اتىراۋ وبلىستارىندا رەسەيلىك كاسىپورىنداردىڭ اليۋميني جانە مۇناي-حيميا كلاستەرىندە جۇمىس ىستەۋى ءۇشىن قولايلى جاعداي بار. وسى باعىتتاعى شەكارا ماڭىنداعى ىنتىماقتاستىق كووپەراتسياسى ەلدەرىمىزدىڭ ونەركاسىپ الەۋەتىن نىعايتۋعا جاردەمدەسەتىنىنە سەنىمدىمىن»، - دەدى قازاقستان پرەزيدەنتى.
قاسىم-جومارت توقايەۆ ءوڭىرارالىق جانە شەكاراماڭى ىنتىماقتاستىعى ەكى ەلدىڭ بارلىق باعىت بويىنشا سىندارلى ءوزارا ءىس-قيمىلى ءۇشىن بازالىق پلاتفورما بولۋعا ءتيىس دەگەن ويىن جەتكىزدى.
«قازىرگى پىكىرتالاس ەلدەرىمىز اراسىنداعى تەڭ جانە ءوزارا ءتيىمدى ارىپتەستىكتى نىعايتۋعا باعىتتالعان جاڭا باستامالاردى ازىرلەۋگە مۇمكىندىك بەرەتىنىنە سەنىمدىمىن»، - دەدى مەملەكەت باسشىسى.