قازاقستان مەن رەسەي ءتيىمدى ستراتەگيالىق سەرىكتەستىك قالىپتاستىرا الدى - توقايەۆ
«ەڭ الدىمەن رەسەي پرەزيدەنتىنە جانە بارلىق رەسەيلىك ارىپتەسىمە وسىناۋ ءىس-شارانى وتە جوعارى دەڭگەيدە ۇيىمداستىرعانى ءۇشىن ريزاشىلىعىمدى بىلدىرگىم كەلەدى. جانە دە فورۋم تاقىرىبىنىڭ ءوزى حالىقارالىق ساۋداداعى داعدارىس پەن گەوساياسي بەلگىسىزدىكتىڭ قازىرگى جاعدايىندا زور ماڭىزعا يە. شىندىعىندا، بارلىق شەكتەۋلەردى الىپ تاستاۋ جانە ساۋدادا ءوزارا ءتيىمدى جاعداي جاساۋ ەلدەرىمىزدىڭ ساپالى ەكونوميكالىق وسىمىنە نەگىز بولادى. سوندىقتان، بۇگىنگى كەزدەسۋىمىزدىڭ ەرەكشە ماڭىزى بار»، - دەدى مەملەكەت باسشىسى.
وسى رەتتە ق ر پرەزيدەنتى دۇنيەجۇزىلىك ساۋدا ۇيىمىنىڭ دەرەگىنە سايكەس، الەمنىڭ ەڭ دامىعان ەلدەرى سوڭعى جارتى جىلدا ەكسپورتتىق شەكتەۋلەر ەنگىزۋ قارقىنىن ارتا تۇسكەندىگىنە نازار اۋدارتتى.
«ماسەلەن، G20 ەلدەرى وسى جىلدىڭ مامىرىنان قازانعا دەيىن ساۋدا-ساتتىق كولەمى 160 ميلليارد دوللاردان اسپايتىن تاۋارلارعا 47 شەكتەۋ ءىس-شارالارىن ەنگىزدى. ءسوز ەكسپورتقا ۇنەمى تۋىنداپ وتىرعان شەكتەۋلەر، قوسىمشا ليتسەنزيالىق تالاپتار، كۆوتالار مەن سالىقتار جايىندا بولىپ وتىر. وسىنىڭ اياسىندا قازاقستان مەن رەسەي اراسىنداعى ىنتىماقتاستىق جاھاندىق تەندەنتسيادان وزگەشە بولۋى قۋانتادى»، - دەدى پرەزيدەنت.
مەملەكەت باسشىسى وتكەن جىلى قازاقستان مەن رەسەي اراسىنداعى ديپلوماتيالىق قارىم-قاتىناستىڭ ورناعاندىعىنا 30 جىل تولۋى اتالىپ وتكەندىگىن ەسكە سالدى.
«وسى ۋاقىتتىڭ ىشىندە مەملەكەتتەرىمىز مىعىم دوستىق پەن تاتۋ كورشىلىككە نەگىزدەلگەن ءوزارا ءتيىمدى ستراتەگيالىق سەرىكتەستىكتى قالىپتاستىرا الدى. ەلدەرىمىزدىڭ اراسىندا سەنىمدى، سىندارلى ديالوگ قالىپتاسىپ، ىنتىماقتاستىقتىڭ جوعارى دەڭگەيىنە قول جەتكىزىلدى»، - دەدى مەملەكەت باسشىسى.