استانا اۋماعىندا جاڭا اۋدان قۇرىلماق
28 قاراشا, 20:43

استانا اۋماعىندا جاڭا اۋدان قۇرىلماق

استانا. قازاقپارات - استانا اۋماعىندا تاعى ءبىر اۋدان قۇرىلۋى مۇمكىن. بۇل تۋرالى «اشىق» ن ق ا پورتالىندا جاريالانعان ەلوردا اكىمدىگىنىڭ قاۋلىسى جانە ءماسليحات شەشىمىندە كورسەتىلگەن، دەپ حابارلايدى قازاقپارات ءتىلشىسى.

«قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» زاڭىنىڭ 13-بابى 3-تارماقشاسىنا سايكەس استانا قالاسىنىڭ اكىمدىگى ءماسليحات شەشىمىن نەگىزگە الا وتىرىپ كەلەسىنى قاۋلى ەتەدى:

«استانا قالاسىندا جاڭا اۋدان قۇرىلسىن.

استانا قالاسىنىڭ «الماتى»، «بايقوڭىر»، «ەسىل»، «سارىارقا» اۋداندارىنىڭ جانە جاڭا اۋداننىڭ شەكارالارى وسى بىرلەسكەن قاۋلىعا جانە شەشىمگە قوسىمشاعا سايكەس بەلگىلەنسىن.

وسى بىرلەسكەن استانا قالاسى اكىمدىگىنىڭ قاۋلىسى جانە ءماسليحاتىنىڭ شەشىمى ونىڭ العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى».

قۇجات جوباسىنا سايكەس، جاڭا اۋداننىڭ شەكاراسى 19336 گەكتاردى قۇرايدى. ول قالانىڭ باتىس بولىگىندەگى ەسىل وزەنىنىڭ بويىمەن شىعىسقا قاراي قابانباي باتىر داڭعىلىنا دەيىن، ودان ءارى قابانباي باتىر داڭعىلىنىڭ تاق ساندار جاعىمەن جانە قارقارالى تاس جولىنىڭ باتىس جاعىمەن قالانىڭ وڭتۇستىك شەكاراسىنا دەيىن اۋماقتى قامتيدى.

جاڭا اۋدانعا قانداي اتاۋ بەرىلەتىنى ازىرگە بەلگىسىز. ەگەر اتالعان ۇسىنىس رەسمي بەكىتىلسە، وندا استانادا 5 اكىمشىلىك-اۋماق پايدا بولادى.

ەلوردا اكىمدىگىنىڭ قاۋلىسى مەن ماسليحاتتىڭ شەشىمىن اشىق تالقىلاۋ 7- جەلتوقسانعا دەيىن جالعاسادى.

جاڭالىقتار