28 قاراشا, 20:58

حالقىمىز ءتىل- كوز تيگەندە قالاي ەمدەگەن؟

استانا. قازاقپارات – حالقىمىز ءتىل-كوز تيۋدەن قاتتى جاسقانعان. ءتىل-كوز تيمەس ءۇشىن بارىنشا سالت-جورالعى جاساپ، بالاسى مەن جاقسى كورەتىن ادامىن قورعاعان. دىندە دە ءتىل-كوز تيۋ ۇعىمى بار.

ءتىل-كوز تيۋدەن ساقتانۋدان بولەك ءتىل-كوز تيگەندە ەمدەلۋدىڭ دە جولىن تاپقان. ءتىل-كوز تيگەننىڭ بەلگىسى انىق بايقالادى. ادامنىڭ ىستىعى كوتەرىلىپ، دەنەسى كۇيىپ-جانادى. ءتىل قاتتى تيسە دەنەسى قارايىپ، كوگەرىپ، بالا بولسا كوزىن اشپاستان جىلاپ، بىردەن السىرەي باستايدى. كەيبىر تۇسىنىكسىز جاعدايدا اۋىرعان ادامنىڭ ارقاسىنىڭ الاقانداي جەرى قارايىپ كەتۋىنەن ءتىل-كوز تيگەنىن بىلۋگە بولادى دەگەن سەنىم بار.

ال كوز تيگەندە ادام قۇسىپ، كوزى كىرتيەدى، ءىشى ءوتىپ، دەنەسى قىزادى.

ءتىل-كوزدىڭ جەڭىل ءتۇرىن ەمدەۋگە نەگىزىنەن اشتاۋ (اشىلاۋ)، دەم سالۋ، ۇشكىرۋ، ۇشىقتاۋ، تۇكىرتۋ سياقتى ەم-دوم تاسىلدەرى جاسالادى.

ءتىل-كوز تيگەن بالانى ەمدەۋ ءتاسىلىنىڭ ءبىرى اشتاۋ نەمەسە اشىلاۋ دەپ اتالادى. اۋىرعان بالانى كوبىنەسە جاسى ۇلكەن ايەل اشتايدى. ەمدەۋدىڭ بۇل ءتۇرى - كۇل، تۇز، جۇمىرتقا، كەبەك نەمەسە نان سياقتى زاتتار ارقىلى اتقارىلادى. كوزى نەمەسە ءسوزى ءوتىپ كەتكەن ادامدى تاۋىپ سونىڭ ءبىر دۇنيەسىنەن قيقىم الىپ تۇتەتۋ نەمەسە سول ادامنىڭ وزىنە تۇكىرتۋ ورىن العان.

ءتىل-كوز تيۋدىڭ اۋىرىراق تۇرلەرىن ەمدەتۋ ءۇشىن مولدا ارنايى دۇعا وقىپ ۇشكىرىپ ەمدەگەن. ءتىلدىڭ اسا اۋىر سۇعىنا قارسى باقسىلارعا «ءتىل كەستىرۋ» شاراسىن جاساتقان. بۇل ءتاسىل بويىنشا ەمدەيتىن باقسى دەرتكە ۇشىراعاندى وڭاشا ءۇي تىككىزىپ، جەكە ۇستاپ، ەشكىمگە كورسەتپەي ەمدەيدى. دۇعا وقىپ، ۇشىقتاپ ەمدەۋدىڭ بەلگىلى ۋاقىتى اياقتالعان سوڭ قۇرباندىققا مال شالىپ، ەل-جۇرتتان العىس الادى. سونىڭ وزىندە كوبىنەسە ەل جينالعان جەرگە بارۋعا تىيىم سالادى.

massaget.kz

جاڭالىقتار