كومادان شىققان ايدوس ەربوسىن ۇلى قازاقستاندىقتارعا ۇندەۋ جاسادى

استانا. قازاقپارات – تانىمال قازاقستاندىق بوكسشى ايدوس ەربوسىن ۇلى كومادان شىققاننان كەيىن وتانداستارىنا جازبا جاريالادى، - دەپ حابارلايدى Vesti.kz.

بوكسشى وزىنە قولداۋ بىلدىرگەن حابارلامالاردىڭ سكرينشوتتارىن جاريالاپ، الاڭداپ، قولداۋ ءبىلدىرىپ وتىرعان وتانداستارىنا العىسىن ءبىلدىردى.

«وسىعان ۇقساس حاتتار كوپ كەلگەن ەكەن، بارشا قولداپ جاتقان حالقىما راقمەت. اللا قالاسا مىقتى بولىپ ورالارىم ءسوزسىز. الار اسۋىمىز الدا»، - دەپ جازدى ەربوسىن ۇلى.

ەسكە سالايىق، 6- قاراشادا قازاقستاندىق بوكسشى كۋبالىق داۆيد موررەلدەن نوكاۋتپەن جەڭىلگەن بولاتىن. سۋپەرورتا سالماق ساناتىنداعى جەكپە-جەك WBA- ءدىڭ «تۇراقتى» الەم چەمپيونى اتاعى ءۇشىن ءوتتى. جەكپە-جەكتەن كەيىن ول شۇعىل تۇردە ميننەاپوليس قالاسىنداعى اۋرۋحانالاردىڭ بىرىنە جەتكىزىلدى. وعان «ميىنا قان كەتۋ» دياگنوزى قويىلدى. بۇدان ءارى ول جاساندى تۇردە كوماعا جىبەرىلىپ، وتا جاسالدى.