سولتۇستىك قازاقستاندا قاراۋسىز جۇرگەن جۇزدەن استام جىلقىنىڭ يەسى ىزدەستىرىلىپ جاتىر
28 قاراشا, 19:41

سولتۇستىك قازاقستاندا قاراۋسىز جۇرگەن جۇزدەن استام جىلقىنىڭ يەسى ىزدەستىرىلىپ جاتىر

پەتروپاۆل. قازاقپارات - سولتۇستىك قازاقستان وبلىسىندا پوليسەيلەر باعۋسىز جۇرگەن 100 دەن استام جىلقىنىڭ يەسىن ىزدەستىرىپ جاتىر. ءتارتىپ ساقشىلارى مال قوجايىنىنا ايىپپۇل سالماق، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، تايىنشا اۋدانىندا پوليسەيلەر قاراۋسىز جۇرگەن 100 باستان اساتىن ءۇيىر- ءۇيىر جىلقىنى انىقتادى. ولاردىڭ يەسىن ىزدەپ- تابۋ بويىنشا شارالار قولعا الىندى. مالدىڭ قوجايىنى ق ر اكىمشىلىك قۇقىق بۇزۋشىلىق تۋرالى كودەكستىڭ 408-بابى بويىنشا جاۋاپقا تارتىلاتىن بولادى.

ءتارتىپ ساقشىلارى مالدىڭ ەركىن جايىلۋى مال ۇرلىعىنا جاعداي جاسايتىنى تۋرالى، قاڭعىپ جۇرگەن مال جولعا شىعىپ، جول- كولىك وقيعاسىنا سەبەپكەر بولۋى مۇمكىن ەكەندىگىن ەسكە سالدى.

«وبلىستا مال ۇرلىعىنىڭ تومەندەگەنى بايقالادى. جىل باسىنان وسىنداي 21 قىلمىس تىركەلگەن، وتكەن جىلدىڭ ۇقساس كەزەڭىندە 31 ءى انىقتالدى. وسىنداي قىلمىستاردىڭ اۋىر ءتۇرى ايتارلىقتاي تومەندەدى، وتكەن جىلى 23 بولسا، بيىل 9 فاكتى تىركەلىپ وتىر. تۇلىكتى ەركىن جايۋ قاعيدالارى ەنگىزىلمەي تۇرىپ، وبلىستا مال ۇرلىعى بىرنەشە ەسەگە كوپ بولاتىن. مال يەلەرى مەن باقتاشىلاردىڭ جاۋاپكەرشىلىگىن ارتتىرۋ - مال ۇرلىعىنىڭ الدىن الۋدا ناتيجە بەرىپ جاتىر»، - دەيدى س ق و پوليتسيا دەپارتامەنتى كريمينالدىق پوليتسيا باسقارماسىنىڭ باستىعى مارات جۇماليەۆ.

اۋدانداردا پوليسيا ءبولىمىنىڭ قىزمەتكەرلەرى مالدىڭ قاراۋسىز ءجۇرۋ فاكتىلەرىن انىقتاۋ ماقساتىندا جۇمىس ىستەپ جاتىر. حالىققا زاڭناما تالاپتارى، مالدى ۇيىمداسقان تۇردە جايۋ ماقساتىندا جاسالاتىن ءۇش جاقتى شارتتاردىڭ باسىمدىلىعى تۇسىندىرىلەدى.

جىل باسىنان مالدى قاراۋسىز جىبەرگەنى ءۇشىن 4030 ادام جاۋاپكەرشىلىككە تارتىلدى. ارنايى ۇستاۋ ورىندارىنا قاڭعىپ جۇرگەن 11 مىڭنان استام مال ورنالاستىرىلدى.


جاڭالىقتار