وتاندىق سەريالداردىڭ ساپاسى مەن تىلدىك ەرەكشەلىگىنە نازار اۋدارىلۋى كەرەك - جازۋشىلار پىكىرى
اقپارات جانە قوعامدىق دامۋ مينيسترلىگى جانىنان قۇرىلعان قوعامدىق كوركەمدىك كەڭەستىڭ العاشقى وتىرىسىندا جازۋشىلار وسىنداي ماسەلە كوتەردى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.
«مەملەكەت باسشىسىنىڭ تاپسىرماسىمەن تاريحي جوبالاراعا، حالقىمىزدىڭ سالت- ءداستۇرى مەن تاريحىن، نەگىزگى قۇندىلىقتارىن ناسيحاتتايتىن ونىمدەرگە باسا نازار اۋدارىپ وتىرمىز. مينيسترلىكتىڭ جانىنان قوعامدىق كەڭەس قۇرۋداعى ماقسات - سەريالدىق جانە دەرەكتى فيلم ءوندىرىسىنىڭ دامۋىنا ساپالى ىقپال ەتۋ، بولاشاعىنا باعدار بەرۋ، سەريالدىق ونىمدەردىڭ وزەكتى ماسەلەلەرىن تالقىلاۋ، ونىمدەردىڭ تاقىرىپتىق ءارى مازمۇندىق باعىتىن سارالاۋ. تاريحي كەزەڭدەرگە، ۇلت بولمىسىن وزگەرتكەن وقيعالارعا، قوعام ومىرىندەگى كوكەيكەستى ماسەلەلەر مەن پروتسەسستەرگە ءمان بەرىلمەك. تاعدىرلى كەزەڭدەردىڭ باسى- قاسىندا جۇرگەن تۇلعالاردىڭ ءرولىن دە سول تاقىرىپ اياسىندا تۇتاس كورسەتۋ كوزدەلىپ وتىر»، - دەدى اقپارات جانە قوعامدىق دامۋ ءمينيسترى دارحان قىدىرالى قوعامدىق كوركەمدىك كەڭەستىڭ العاشقى وتىرىسىندا.
كەزدەسۋگە بەلگىلى جازۋشىلار، رەجيسسەرلەر، سسەناريستەر مەن تەلەارنا باسشىلارى قاتىستى.
كەڭەس وتىرىسىندا جازۋشى سماعۇل ەلۋباي سەريالداردىڭ كوركەمدىك ساپاسىن ارتتىرۋ ماسەلەسىن كوتەرسە، جازۋشى، دراماتۋرگ روزا مۇقانوۆا تەلەحيكايالاردىڭ كوركەمدىك شەشىمىنە ءمان بەرىلىپ، تىلدىك ەرەكشەلىگىنە باسا نازار اۋدارىلۋى كەرەكتىگىن ايتتى. سونىمەن بىرگە، رەجيسسەر قاليلا ومار بالالارعا ارنالعان تەلەحيكايالار ءوندىرىسىن قولعا الۋ ماسەلەسىن كوتەرسە، الەكساندر اكسيۋتيتس جاس ماماندارعا دەبيۋت بەرۋ باستاماسىن قولعا الۋعا شاقىردى.
