اۋە قورعانىسى كۇشتەرى: جاۋىنگەرلىك دايىندىق باستى نازاردا

استانا. قازاقپارات - اۋە قورعانىسى كۇشتەرىندە جاڭا وقۋ كەزەڭىندە جاۋىنگەرلىك دايارلىقتىڭ قارقىندىلىعىن ارتتىرۋ كوزدەلىپ وتىر.

قازاقستان اۋە قورعانىسى كۇشتەرىنىڭ باس قولباسشىسى، اۆياتسيا گەنەرال- لەيتەنانتى نۇرلان ورمانبەتوۆ الماتى جانە جەتىسۋ گارنيزوندارى بولىمشەلەرىنىڭ قىسقى وقۋ كەزەڭىنە دايىندىعىن تەكسەردى. بۇل تۋرالى قازاقپارات قورعانىس مينيسترلىگىنە سىلتەمە جاساپ حابارلايدى.

كەشەندى كوميسسيا الماتى گارنيزونىنا جۇمىس ساپارى بارىسىندا اسكەري بولىمدەر مەن بولىمشەلەردەگى وبەكتىلەردىڭ، قارۋ- جاراقتار مەن اسكەري تەحنيكالاردىڭ جاي- كۇيىن، وق- دارىلەردىڭ ساقتالۋىن، جاۋىنگەرلىك كەزەكشىلىك پەن اسكەرلەر قىزمەتىن ۇيىمداستىرۋ ماسەلەلەرىن زەردەلەدى.

جەتىسۋ گارنيزونىنداعى اۆياتسيالىق بازادا ۇشۋ جانە ينجەنەرلىك- تەحنيكالىق قۇرامداردىڭ، اسىرەسە ۇشقىش- نۇسقاۋشىلاردىڭ، سونداي- اق قامتاماسىز ەتۋ بولىمشەلەرىنىڭ دايىندىق دەڭگەيى تەكسەرىلدى. اۆياتسيالىق تەحنيكانى قىسقى پايدالانۋ رەجيمىنە كوشىرۋ بويىنشا ماۋسىمدىق جۇمىستاردىڭ ورىندالۋ ساپاسىنا باسا نازار اۋدارىلدى.

اۋە قورعانىسى كۇشتەرىندە جاڭا وقۋ كەزەڭىندە جاۋىنگەرلىك دايارلىقتىڭ قارقىندىلىعىن ارتتىرۋ كوزدەلىپ وتىر. ۇشۋ قۇرامىنىڭ ۇشۋ ساعاتتارى، اۋە شابۋىلىنا قارسى قورعانىس اسكەرلەرىنىڭ بولىمشەلەرىندە - اۋە كەڭىستىگىن قورعاۋعا باعىتتالعان ارنايى جاتتىعۋلاردىڭ كولەمى ۇلعايتىلاتىن بولادى. بۇل رەتتە بارلىق ساناتتاعى جەكە قۇرامنىڭ كاسىبي دەڭگەيىن ارتتىرۋعا، ۇشۋ اپپاراتتارىنا، قارۋ- جاراق جۇيەلەرى مەن اسكەري تەحنيكاعا اپاتسىز قىزمەت كورسەتۋگە ەرەكشە نازار اۋدارىلماق.

كوميسسيا مۇشەلەرى مەرزىمدى قىزمەتتەگى اسكەري قىزمەتشىلەرمەن، جاس لەيتەنانتتارمەن جانە اسكەري وقۋ ورىندارىنىڭ سەرجانت تۇلەكتەرىمەن كەزدەستى.

اۋە قورعانىسى كۇشتەرىنىڭ بارلىق بولىمدەرى مەن بولىمشەلەرىندە جاۋىنگەرلىك دايىندىق قارقىندى تۇردە جۇرگىزىلمەك. ۇشۋ جانە ينجەنەرلىك- تەحنيكالىق قۇرام وقۋ- جاتتىعۋ ۇشۋلارى كەزىندە ءوز شەبەرلىگىن ۇدايى جەتىلدىرىپ وتىرادى. اۋە شابۋىلىنا قارسى قوعانىس اسكەرلەرىنىڭ جەكە قۇرامى تاۋلىك بويى ەلدىڭ اۋە كەڭىستىگىن بۇركەمەلەۋ شارالارىن ورىندايدى.

فوتو: gov.kz