قىتايدا «قامشى» فيلمى شىقتى، موڭعوليادا قازاق جازۋشىسى مەملەكەتتىك اتاق الدى - شەتەلدەگى قازاق باسپا ءسوزى

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

23 -قاراشادا ونلاين رەجيمىندە قىتايدىڭ شىڭجاڭى مەن قازاقستان كاسىپكەرلەرىنىڭ قىزمەت كورسەتۋ ساۋداسى بويىنشا ونلاين كەزدەسەتىن ارنايى ءىس- شاراسى ءوتتى. بۇل بيىلعى وسى سالاداعى ەكىنشى ءىس- شارا، دەپ حابارلايدى قىتايدىڭ «حالىق گازەتى» اقپاراتتىق پورتالى.

بۇل جولعى ونلاين سايكەستىرۋ ءىس- شاراسى تىكەلەي بەينەترانسلياتسيا تۇرىندە وتكىزىلدى جانە قىتاي مەن قازاقستاننان 120-دان استام قاتىسۋشى كومپانيا ءۇش توپقا ءبولىنىپ، ونلاين رەجيمىندە قوسىلدى.

قىتايلىق ب ا ق- تىڭ مالىمەتىنشە، سەرىكتەستەردى ىرىكتەۋ ءىس- شاراسىندا قىتاي مەن قازاقستاننان كەلگەن 32 كومپانيانىڭ وكىلدەرى ىنتىماقتاستىققا تارتۋ ءۇشىن باعدارلامالىق قامتاماسىز ەتۋدى زەرتتەۋ مەن ازىرلەۋگە، انيماتسيا ديزاينىنا، اقپاراتتىق تەحنولوگيالارعا، مادەني شىعارماشىلىققا، قارجىلىق قىزمەتتەرگە، حالىقارالىق مەديتسينالىق تەحنولوگيالارعا، حالىقارالىق لوگيستيكاعا جانە قىزمەت كورسەتۋ ساۋداسىنىڭ باسقا دا سالالارىنا باسا نازار اۋداردى.

موڭعول پرەزيدەنتى جازۋشى سۇلتان تاۋكەي ۇلىنا مەملەكەتتىك اتاق بەردى - Kaznews

رەسپۋبليكا كۇنىنە 98 جىل، ۇلى يمپەراتور شىڭعىس حاننىڭ تۋعانىنا 860 جىل، «موڭعول ماقتانىش» كۇنىنە وراي موڭعوليا پرەزيدەنتى ۋحنااگين ءحۇرەلسۇح جارلىق شىعارىپ ءبىرقاتار ازاماتتارعا مەملەكەتتىك جوعارعى اتاق، وردەن، مەدال تابىستادى.

موڭعوليا پرەزيدەنتى ۋحنااگين ءحۇرەلسۇحتىڭ جارلىعى بويىنشا موڭعوليا مادەنيەتىنە ەڭبەك سىڭىرگەن قايراتكەر سۇلتان تاۋكەي ۇلىنا «حالىق جازۋشىسى» اتاعى بەرىلدى، دەپ حابارلايدى «Kaznews» اقپاراتتىق اگەنتتىگى.

اتالعان باسىلىمنىڭ دەرەگىنشە، سۇلتان تاۋكەي ۇلى مەملەكەتكە 60-جىلدان استام ەڭبەك ەتىپ، كوپتەگەن ماقالا، پوۆەست، رومان، دراما، كينوفيلمدەر جازىپ، قازاق حالقىنىڭ ادەبيەتىن حالىقارالىق دەڭگەيدە تانىتۋعا بار ونەرىن ارنادى.

سونداي- اق، «موڭعولدىڭ قۇپيا شەجىرەسى» ، «ەجەلگى موڭعول پاتشالارىنىڭ ۇلتتىق ەنتسيكلوپەدياسى» سياقتى تاريحي دەرەككوزدەر، «موڭعول حالىق ماقال- ماتەلدەرى» ، «موڭعوليا كونستيتۋتسياسى» قاتارلى تۋىندىلاردى قازاق تىلىنە اۋدارىپ، قازاق وقىرماندارىنا ۇسىنعان.

سونىمەن قاتار، «قۇران كارىم»، «يسلام تۋرالى نەگىزگى مالىمەتتەر»، اباي قۇنانبايەۆتىڭ «قارا سوزدەرى» قاتارلى تۋىندىلاردى موڭعول تىلىنە اۋدارىپ، حالىق اعارتۋ ىسىنە زور ۇلەس قوسقان.

ايتا كەتەيىك، حالىق جازۋشىسى سۇلتان تاۋكەي ۇلى 1944 -جىلى 17-قاراشادا مونعوليانىڭ بايان- ولگي ايماعىندا تۋعان.1966 -جىلى موڭعوليا ۋنيۆەرسيتەتىن بىتىرگەن. ەكونوميكا عىلىمىنىڭ كانديداتى. مەملەكەت، قوعام قايراتكەرى. موڭعوليا حالىق رەسپۋبليكاسىندا ساۋدا مينيسترلىگى دەپارتامەنتىنىڭ باستىعى، اۋداندىق، قالالىق، ايماقتىق پارتيا كوميتەتتەرىنىڭ ەكىنشى جانە ءبىرىنشى حاتشىسى بولعان.

موڭعوليا رەسپۋبليكاسىنىڭ پارلامەنت مۇشەسى بولىپ سايلانعان. موڭعوليانىڭ ۆەنگريا، اۆستريا ەلدەرىندەگى توتەنشە جانە وكىلەتتى ەلشىسى قىزمەتىن اتقارعان.

سۇلتان تاۋكەي ۇلى مەملەكەتتىك جاۋاپتى قىزمەتتەردە ءجۇرىپ، 1964 -جىلدان باستاپ ادەبيەتپەن شۇعىلدانىپ، پروزا، دراما، اۋدارما جانرلارىندا جەمىستى ەڭبەك ەتىپ كەلەدى. وننان اسا كىتاپتىڭ اۆتورى. شىعارمالارىن ەكى تىلدە - قازاق جانە مونعول تىلدەرىندە جازادى.

سونداي- اق وسى اپتادا موڭعوليالىق ب ا ق- تىڭ مالىمەتىنشە، قىتايدان ماسكەۋگە باعىتتالعان جۇك كولىكتەرىنىڭ العاشقى لەگى بايان- ولگي ارقىلى وتكەن.

بەلگىلى بولعانداي، 2022 -جىلدىڭ 20 -قاراشاسىندا قىتايدىڭ تايكەشكەن پورتىنان رەسەي فەدەراتسياسىنىڭ ماسكەۋ قالاسىنا جەتكىزىلەتىن جۇكتىڭ ءبىرىنشى لەگى موڭعوليانىڭ بايان- ولگي ايماعىندا ورنالاسقان ساگاانۋۋر پورتى ارقىلى ءوتتى.

قىتايدا «قامشى» فيلمى جارىق كوردى - CNR

جاقىندا عانا «تيانشان» كينوستۋدياسى جاساعان، دۇڭ شينۋىن، گاۋ حۋاڭگاڭ سسەناريىن جازعان «قامشى» فيلمى جينجي بايحۋا فەستيۆالىندە قويىلدى، دەپ حابارلايدى قىتايدىڭ «ورتالىق حالىق راديوسى» اقپاراتتىق پورتالى.

قىتايلىق باسىلىمنىڭ كەلتىرگەن مالىمەتىنە سۇيەنسەك، بۇل فيلمدە التايداعى «جازدا ات مىنەتىن، قىستا قارشاڭعى تەبەتىن» ەرەكشە دەنەشىنىقتىرۋ ساباعى ارقاۋ ەتىلىپ، كىشكەنتاي اڭساردىڭ ارمان قۋىپ، اتامەكەنىنىڭ ات مادەنيەتىن جالعاستىرۋ ءۇشىن ۇلەس قوسقان اڭگىمەسى باياندالعان.

ايتا كەتەيىك، قىتايلىق باسىلىمدارىڭ دەرەگىنشە، قىتايدىڭ التاي قالاسى مۇز جانە قار سپورتى تۇرلەرىنە بەلسەندى قاتىسۋعا دايارلاۋ ءۇشىن بالالارعا كوبىرەك مۇمكىندىك بەرەدى. قىس باستالعاندا التاي قالاسى قار- شاڭعى الاڭىندا ورتا مەكتەپ وقۋشىلارى اقىسىز جانە جەڭىلدەتىلگەن تۇردە پايدالانۋعا مۇمكىندىك الادى. وقۋشىلاردى تاۋدا شاڭعى تەۋىپ ۇيرەنۋگە ىنتالاندىرۋ ءۇشىن 18 جاسقا دەيىنگى مەكتەپ تۇلەكتەرىنىڭ شاڭعى تەبۋىنە بارىنشا جەڭىلدىكتەر جاسالعان.

«CNR» - ءدىڭ دەرەگىنشە، «قامشى» دەپ اتالاتىن بۇل فيلم شىڭجاڭدىق جاسوسپىرىمدەردىڭ ات سپورتىنا ەرەكشە ىنتاسىن، ات بايگەسىنىڭ شاباندوزى بولۋعا دەگەن تالپىنىسىن جان- جاقتى بەينەلەگەن. سونىمەن قاتار، اتالعان فيلمدە تابيعاتتىڭ كوركەم كورىنىسى جانە سالت- ءداستۇر مەن ۇلتتىق سپورت كورسەتىلگەن.

وزبەكستاندا كريپتوۆاليۋتا قىزمەتى زاڭدى تۇردە جولعا قويىلدى - «ءو ز ا»

«وزبەكستان كريپتو- اكتيۆتەردىڭ اينالىمىن رەتتەيتىن زاڭنامالىق بازاسى جاقسى قالىپتاسقان ساناۋلى ەلدەردىڭ ءبىرى بولىپ تابىلادى. بۇل ەكى كومپانيا ت م د جانە ورتالىق ازياداعى العاشقى كريپتو- دۇكەن بولدى»، دەپ مالىمدەيدى وزبەكستاندىق «ءو ز ا» اقپاراتتىق اگەنتتىگى ءو ر پەرسپەكتيۆالىق جوبالار ۇلتتىق اگەنتتىگىنە سىلتەمە جاساپ.

اتالعان باسىلىمنىڭ مالىمەتىنشە، 2022 -جىلدىڭ 31 -قازانىندا كۇشىنە ەنگەن ەرەجەلەرگە سايكەس، كريپتو- دۇكەن كليەنتتەرگە ەلەكتروندى پلاتفورماعا نەمەسە ساۋدا وبەكتىسىنە (وفلاين) كىرۋ مۇمكىندىگىن بەرۋ ارقىلى كريپتو- اكتيۆتەردى ساتىپ الۋ/ساتۋ وپەراتسيالارىن جۇزەگە اسىرادى.

قازاقستان- تۇركيا قاتىناستارى تۋرالى YTB ءتوراعاسى نىڭ ماقالاسى جاريالاندى - TRT

وسى اپتادا تۇركيا راديو تەلەۆيزيا پورتالىندا «قازاقستان- تۇركيا قاتىناستارى جانە YTB» دەگەن تاقىرىپتاعى شەتەلدەگى تۇرىكتەر جانە اعايىن قاۋىمداستىقتار باسقارماسىنىڭ (YTB) ءتوراعاسى ابدۋللاح ەرەننىڭ ماقالاسى جاريالاندى.

اتالعان ماقالا «ەجەلدەن كەلە جاتقان ءداستۇرىن ساقتاي وتىرىپ، زامان اعىمىنا سۇرىنبەي ىلەسىپ كەلە جاتقان دوس جانە باۋىرلاس قازاقستان قاشاندا جۇرەگىمىزدە ەرەكشە ورىنعا يە. تاۋەلسىزدىگىن جاريالانعان كۇنى تۇركيا مويىنداعان قازاقستان رەسپۋبليكاسىنىڭ سول كەزدەن بەرى جۇرگىزىپ جاتقان تۇراقتى ساياساتىن ماقتانىشپەن كورىپ كەلەمىز جانە قولداپ جۇرەمىز» دەپ باستالعان.

جازبا اۆتورىنىڭ پىكىرىنشە، قازاقستان مەن تۇركيا اراسىنداعى قارىم- قاتىناستار الدەقايدا تەرەڭ ءارى بەرىك قۇندىلىقتارعا نەگىزدەلگەن دەپ ايتۋعا بولادى. ەكى ەل، بىلايشا ايتقاندا، ءبىر ءۇيدىڭ ەكى بالاسىنداي. ولاردىڭ تامىرى ءبىر جانە تاريحتىڭ وتە كونە داۋىرلەرىنەن باستاۋ الادى.

ماقالادا جازىلعانىنداي، تاريحتاعى وقيعالار ەكى ەلدىڭ ءارتۇرلى تاجىريبە جيناقتاۋىنا نەگىز بولعانىمەن، مادەني جاقىندىق ەشقاشان ۇزىلمەگەن. بۇگىن ەكى ەل اراسىنداعى باۋىرلاستىقتى نىعايتا تۇسەتىن تاريح پەن وركەنيەتتىڭ ورتاق مۇراسىن وڭدەپ، وسى مۇرادان قۋات الاتىن ۇلى جوبالاردى جۇزەگە اسىراتىن كەز كەلدى، دەگەن ويىن تىلگە تيەك ەتەدى اۆتور.

سونىمەن قاتار، شەتەلدەگى تۇرىكتەر جانە اعايىن قاۋىمداستىقتار باسقارماسى (YTB) بىردەي مادەني كودتار اياسىندا الەمدەگى بارلىق قاۋىمدارمەن ورناتقان قارىم- قاتىناستارىن تۇركىستان گەوگرافياسىندا دا جالعاستىرۋدا. وسى وڭىردەگى دوس جانە باۋىرلاس حالىقتارعا كورسەتكەن ەرەكشە جاقىندىعىمىز قازاقستانعا كەلگەندە ەڭ جوعارى دەڭگەيگە جەتەدى، دەپ جالعاسادى اتالعان جازبا.

بايان- ولگي سپورتشىسى پارا- تاەكۆوندودان التىن يەلەندى - Janadauir.com

قاراشانىڭ 19-20- كۇندەرى وڭتۇستىك كورەيانىڭ چەدجۋ قالاسىندا وتكەن حالىقارالىق پارا- تاەكۆوندو جارىسىندا بايان- ولگي قالاسىنىڭ سپورتشىسى ح. تەمىربەك التىن مەدال جەڭىپ الدى، دەپ حابارلايدى موڭعوليالىق janadauir.com پورتالى.

اتالعان ب ا ق- تىڭ كەلتىرگەن دەرەگىنە سۇيەنسەك، تەمىربەك ۇستىمىزدەگى جىلدىڭ 23-تامىزىندا ۆەتنامنىڭ حوشيمين قالاسىندا وتكەن پارا- تاەكۆوندودان 7- ازيا چەمپيوناتىندا ەرلەر اراسىندا 58 كەلى سالماق دارەجەسىندە ەل نامىسىن قورعاپ، قولا مەدالدى قانجىعاسىنا بايلاعان.

«تەمىربەكتىڭ وسىنداي جەڭىسكە جەتۋىنە «ارمان» تاەكۆوندا كلۋىبىنىڭ جاتتىقتىرۋشىسى ەرۇلان شولەن ۇلىنىڭ ۇلەسى زور. قۇتتىقتايمىز»، دەپ جازادى janadauir.com پورتالى بايان- ولگي ايماعىنىڭ سپورت دەنەشىنىقتىرۋ باسقارماسىنا سىلتەمە جاساپ.

يراندىق كومپانيالار قازاقستاندىق يرانتانۋ ءبولىمى تۇلەكتەرىن جۇمىسقا الۋعا ءازىر - Parstoday

16- قاراشادا ءال- فارابي اتىنداعى قازۇۋ- دىڭ شىعىس تانۋ فاكۋلتەتىندە قازاقستان رەسپۋبليكاسىنداعى يران يسلام رەسپۋبليكاسىنىڭ باس كونسۋلى موحسەن فاعاني جانە يران يسلام رەسپۋبليكاسىنىڭ باس كونسۋلدىعى جانىنداعى مادەني وكىلدىكتىڭ باسشىسى ءماجيت اليگارمەن كەزدەسۋ بولدى.

بۇل تۋرالى وسى اپتادا يراننىڭ Parstoday اقپارات اگەنتتىگى حابارلادى.

اتالعان ب ا ق- تىڭ دەرەگىنشە، باس كونسۋل فاكۋلتەت دەكانىمەن بولعان كەزدەسۋدە قازاقستاندا پارسى ءتىلىن وقىتۋ مەن تاراتۋعا بايلانىستى تۋىنداپ وتىرعان كەيبىر قيىندىقتار تۋرالى اڭگىمەلەگەن.

باس كونسۋلدىڭ ايتۋىنشا، يران تانۋ بولىمىنە تۇلەكتەردى وقۋعا تارتۋ ءۇشىن قازاقستاننىڭ ءبىلىم بەرۋ باعدارلامالارىندا پارسى ءتىلى بويىنشا ارنايى گرانت ءبولۋ ماسەلەسىن كوتەرۋ جونىندە ۇسىنىس جاسادى جانە قازاقستاندىق جاستار يران ۋنيۆەرسيتەتتەرىندە باكالاۆريات، ماگيستراتۋرا جانە دوكتورانتۋرادا گرانتتا وقي الادى. سونىمەن قاتار ول يراننىڭ ءبىلىم، عىلىم جانە جاڭا تەحنولوگيالار مينيسترلىگى پارسى ءتىلى مەن ادەبيەتى وقىتۋشىلارىن جىبەرۋگە دايىن ەكەندىگىن مالىمدەگەن.

Parstoday- ءدىڭ كەلتىرگەن دەرەگىنە سۇيەنسەك، باس كونسۋل يرانتانۋ ءبولىمى تۇلەكتەرىن جۇمىسپەن قامتاماسىز ەتۋگە قازاقستانداعى يران يسلام رەسپۋبليكاسى ەلشىلىگى قولداۋ كورسەتۋگە ءارقاشان دايىن ەكەنىن تىلگە تيەك ەتكەن. سونداي- اق قازاقستاندا جۇمىس ىستەپ جاتقان 5 يراندىق كومپانيا يرانتانۋ ءبولىمى تۇلەكتەرىن جۇمىسقا الۋعا ازىرلىكتەرىن ءبىلدىرىپ وتىرعانىن جانە يران مەن قازاقستان اراسىنداعى بايلانىستار سوڭعى كەزدەرى ەرەكشە قارقىن الىپ، سوڭعى 6-ايدا قازاقستانعا يراننان 50-دەي كومپانيا، 5 رەسمي دەلەگاتسيا كەلگەنىن ايتقان.

اۆتور

بەيسەن سۇلتان