جازۋشى مارحابات بايعۇت ومىردەن وزدى

شىمكەنت. قازاقپارات - جازۋشى، ق ر ەڭبەك سىڭىرگەن قايراتكەرى مارحابات بايعۇت ومىردەن وزدى. بۇل تۋرالى شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان ءوزىنىڭ الەۋمەتتىك جەلىدەگى پاراقشاسىندا جازدى، دەپ حابارلايدى قازاقپارات ءتىلشىسى.

«سۋىت حابار جەتتى. مارحابات بايعۇت اعامىزدىڭ ساعاتى سوعىپتى. باقۇل بولىڭىز، مارحابات اعا!

قازاقتىڭ اياۋلى جازۋشىسى مارحابات بايعۇت اعامىزبەن قوشتاسۋ ەرتەڭ، 27- قاراشا ساعات 14:00-دە جۇمات شانين اتىنداعى قازاق دراما تەاترىندا وتەدى. جانازا نامازى ساعات 15:00-دە بايعۇت بابا مەشىتىندە وقىلادى. تۇلكىباس اۋدانى تۇركىباسى اۋليە ەتەگىندەگى ازاتتىق اۋىلىنىڭ مازارىنا قويىلادى»، - دەپ جازدى شىڭعىس مۇقان ءوزىنىڭ Facebook-تەگى پاراقشاسىندا.

مارحابات بايعۇت 1945 -جىلى 25- مامىردا تۇركىستان وبلىسى تۇلكىباس اۋدانىندا دۇنيەگە كەلگەن. ۇزاق جىلدار بويى اۋداندىق، وبلىستىق باسىلىمداردا، وبلىستىق پارتيا كوميتەتىندە جاۋاپتى قىزمەتتەر اتقارعان. جازۋشىنىڭ «شىلدە»، «ناۋىرزەك»، «قورعانسىز جۇرەك»، «سەرت پەن سەنىم» جانە تاعى دا باسقا كىتاپتارى جارىق كورگەن. ونىڭ شىعارمالارى ورىس، ۋكراين، وزبەك، تۇرىك، قاراقالپاق، ساحا تىلدەرىنە اۋدارىلعان. سونىمەن قاتار، قالامگەر ۆ. شۋكشيننىڭ، يۋ. پوكالچۋكتىڭ، ش. ايتماتوۆتىڭ شىعارمالارىن، ۋ. يرۆينگتىڭ مۇحاممەد پايعامبار تۋرالى كىتابىن قازاق تىلىنە اۋدارعان.

اۆتور

ءاليحان اسقار