قىتايدىڭ چىڭدۋ قالاسىندا وتكەن مارافوندا قانداسىمىز باس جۇلدەنى جەڭىپ الدى

استانا. قازاقپارات - قىتايداعى قانداسىمىز ەدىل نۇربولات ۇلى چەندۋدا وتكەن ەرلەر اراسىنداعى جارتىلاي مارافوندا باس جۇلدەنى جەڭىپ الدى.

اتالعان جارىسقا 10 مىڭنان استام ادام قاتىسقان، دەپ حابارلايدى قىتايدىڭ CNR اقپارات پورتالى.

ب ا ق جاريالاعان اقپاراتقا قاراعاندا، 20-قاراشا كۇنى 10 مىڭنان استام سپورتشى چەندۋ مارافون جارىسىنا قاتىسقان.

وسى مارافوندا شىڭجاڭنىڭ التاي ايماعىنان كەلگەن ەدىل نۇربولات ۇلى 1 ساعات 8 مينۋت 43 سەكۋند ناتيجەمەن بيىلعى چىڭدۋ جارتىلاي مارافون جارىسىندا ەرلەر توبىندا باس جۇلدەنى جەڭىپ الدى.

بۇل - ونىڭ العاش رەت مەملەكەتتىك دەڭگەيدەگى مارافون جارىسىنا قاتىسۋى.

«ەدىل نۇربولات ۇلى 19 جاستا. كىشكەنتايىنان جۇگىرۋگە قىزىققان. ەدىلدى اكەسى التاي ايماقتىق جەڭىل اتلەتيكا كومانداسىنا كاسىپتىك تاربيەگە بەرەدى. 2019 -جىلى شىڭجاڭ ۇيعىر اۆتونوميالى ولكەلىك جاسوسپىرىمدەردىڭ جەڭىل اتلەتيكا جارىسىنىڭ 3000 مەتر جانە 5000 مەتر ارالىققا جۇگىرۋ جارىسىندا باس جۇلدە العان. سودان كەيىن شىڭجاڭ ولكەلىك سپورت جانە دەنە شىنىقتىرۋ ىستەرى مەكەمەسىنىڭ دەنە تاربيە 1- ۇلكەن كومانداسىنا قابىلدانىپ جاتتىعۋىن جالعاستىردى»، دەپ جازادى قىتايلىق ب ا ق.

CNR دەرەگىنشە، 2022 -جىلى 28-قازان كۇنى قىتايدىڭ جىجياڭ ولكەسىنىڭ چۋيجوۋ قالاسىندا وتكەن مەملەكەتتىك جەڭىل اتلەتيكا جارىسىندا ەدىل نۇربولات ۇلى 3 مينۋت 48 سەكۋند ناتيجەسىمەن 1500 مەترگە جۇگىرۋ جارىسىندا ءۇشىنشى بولسا، 5000 مەترلىك جارىستا 14 مينۋت 18 سەكۋند ناتيجەسىمەن ءتورتىنشى بولدى.

وسىلايشا ءوزىنىڭ سپورت تاريحىنداعى ەڭ جوعارى ناتيجەسىن كورسەتكەن.

قازىر ول بۇكىل قىتاي ەلى بويىنشا ەرلەر اراسىندا 5000 مەترگە جۇگىرۋ جالپى تىزىمىندە 16- ورىندا، ال 1500 مەتر بويىنشا 8- ورىندا تۇر.

ەسكە سالا كەتەيىك، بۇعان دەيىن بەيجىڭ مارافونىندا قانداسىمىز ەلەۋبەك قۋان ۇلى توپ جارعان بولاتىن.

اۆتور

بەيسەن سۇلتان