الماتىدا العاش رەت پاتسيەنتكە جاساندى جۇرەك سالىندى

None
الماتى. قازاقپارات - الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا العاش رەت 60 جاستاعى پاتسيەنتكە LVAD - سول جاق قارىنشانىڭ مەحانيكالىق قوسالقى قۇرىلعىسى يمپلانتاتسيالاندى، دەپ حابارلايدى قازاقپارات ءتىلشىسى.

الماتى وبلىسىنىڭ تۇرعىنى 60 جاستاعى عاپپار قاليەۆ سوڭعى ەكى جىلدا جۇرەك جەتكىلىكسىزدىگىمەن اۋىردى.

ءبىر ايدان استام ۋاقىت ول كارديولوگيا ع ز ي ستاتسيونارىندا جاتتى.

دارگەرلەردىڭ سوزىنشە، ناۋقاستى ەنتىگۋ مەن كەۋدەنىڭ قىسىلۋى، اياقتىڭ ءىسىنۋى جانە بۇيرەك پروبلەمالارى مازالاعان. مۇنىڭ ءبارى ولىمگە اكەلۋى مۇمكىن ەدى.

«وپەراتسيا ءساتتى ءوتتى. قازىر ءوزىمدى جاقسى سەزىنەم، اياقتىڭ ءىسىنۋى، ەنتىگۋ، باس اۋرۋى باسىلدى، ۇيىقتايتىن بولدىم. دارىگەرلەرگە العىسىم شەكسىز»، - دەيدى پاتسيەنت.

كلينيكانىڭ ءبىرىنشى باسشىسىنىڭ ايتۋىنشا، ەكى تۇتىگى بار، بىرەۋى قولقاعا، ەكىنشىسى جۇرەكتىڭ سول جاق قارىنشاسىنا قوسىلعان شاعىن سورعى سول جاق قارىنشانىڭ قىزمەتىن اتقارادى.

LVAD ۇزاعىراق ءومىر سۇرۋگە، بۇرىنعى ءومىر سالتىنا ورالۋعا جانە ءومىر ءسۇرۋ ساپاسىن جاقسارتۋعا مۇمكىندىك بەرەدى.

جاساندى جۇرەگى بار ناۋقاستىڭ باسقا ادامداردان ايىرماشىلىعى - ونىڭ تامىر سوعىسى بولمايدى.

«بۇل وپەراتسيانى ءبىزدىڭ كلينيكانىڭ كارديوحيرۋرگتارى استانا قالاسىنداعى ۇلتتىق كارديوحيرۋرگيالىق عىلىمي ورتالىقتاعى ارىپتەستەرىمەن بىرلەسىپ جاسادى. ءبىز جۇرەككە جوعارى تەحنولوگيالىق وپەراتسيالاردىڭ بارلىق ءتۇرىن جاسايمىز. كەلەشەكتە جۇرەك پاتولوگياسىن ەمدەۋدىڭ جاڭا زاماناۋي ادىستەرىن ۇلعايتۋدى جانە ودان ءارى ەنگىزۋدى جوسپارلاپ وتىرمىز»، - دەپ اتاپ ءوتتى دارىگەر.

كارديولوگيا جانە ىشكى اۋرۋلار عزي باسقارما ءتوراعاسى روزا قۋانىشبەكوۆا وپەراتسيادان كەيىن وتباسىنىڭ قولداۋى مەن كومەگى وتە قاجەت، پاتسيەنتتىڭ ءوزى جانە ونىڭ تۋعاندارى كۇندەلىكتى ءدارى-دارمەك پەن تۇراقتى مەديتسينالىق كۇتىمدى قامتيتىن ەرەجەلەردى قاتاڭ ساقتاۋى كەرەك ەكەنىن اتاپ ءوتتى.


سوڭعى جاڭالىقتار