ءبىز قازاقستاندى جاقسى كورەمىز - ۆ. سولوۆيەۆ ءوز شوۋىنداعى ساراپشىلاردىڭ داۋلى سوزدەرىنە پىكىر ءبىلدىردى

None
استانا. قازاقپارات - رەسەيلىك تەلەجۇرگىزۋشى ۆلاديمير سولوۆيەۆ ءوز باعدارلاماسىنداعى ساراپشىلاردىڭ ارانداتۋشىلىق مالىمدەمەلەرىنەن كەيىن ۇندەۋ جاسادى، دەپ حابارلايدى قازاقپارات ءتىلشىسى.

«ءبىز بارلىق كورشىلەرىمىزگە جانە ستراتەگيالىق سەرىكتەستەرىمىزگە قۇرمەتپەن قارايمىز جانە سونداي قارىم-قاتىناسقا ۇمىتتەنەمىز. بۇل بايلانىستاردى قولداپ، نىعايتۋ قاجەت. جازدا قازاقستان پرەزيدەنتى قاسىم-جومارت توقايەۆ پەتەربۋرگ ەكونوميكالىق فورۋمىنىڭ باستى قوناقتارىنىڭ ءبىرى بولدى. قازىر ءبىز ونى ورىنبوردا اسىعا كۇتەمىز، وندا دۇيسەنبى كۇنى توقايەۆتىڭ پۋتينمەن كەزدەسۋى جوسپارلانعان»، - دەدى ۆلاديمير سولوۆيەۆ ءوز باعدارلاماسىندا.

سونىمەن بىرگە، ۆ. سولوۆيەۆ بۇل ساپاردى رەسەيلىك جانە قازاقستاندىق ساياساتتانۋشىلار، ساراپشىلار مەن جۋرناليستەر ءجىتى قاداعالايتىنىن، ءتۇرلى تۇجىرىمدار مەن پايىمدار بولاتىنىن اتاپ ءوتتى.

«بارلىعى ءبىر-ءبىرىن سابىرمەن جانە مۇقيات تىڭداپ، قۇرمەتتەۋى كەرەك. ءبىزدىڭ باعدارلامامىزدىڭ اتىنان توقايەۆ مىرزاعا دەگەن قۇرمەتىمىز وزگەرگەن جوق دەپ ايتا الامىن. قانداي دا ءبىر تۇستا الاڭ تۋدىراتىن نوتالار بار دەپ قابىلدانۋى مۇمكىن، وكىنىشكە وراي كەيدە قىزۋ پىكىرتالاس كەزىندە نەشە ءتۇرلى بولىپ جاتادى. ءبىراق، ءبىز قازاقستاندى جاقسى كورەمىز، قازاق باسشىلىعىن قۇرمەتتەيمىز جانە ورىس-قازاق دوستىعىنىڭ ماڭىزدىلىعىن جاقسى تۇسىنەمىز»، - دەدى ۆ. سولوۆيەۆ.

بۇعان دەيىن پارلامەنت سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى مۇحتار قۇل-مۇحاممەد رەسەيدىڭ تەلەارناسىندا سولوۆيەۆ جۇرگىزگەن باعدارلاماداعى رەسەيلىك ساراپشىلاردىڭ سوزدەرىنە پىكىر ءبىلدىرىپ، وعان ر ف بيلىگى وبەكتيۆتى جاۋاپ بەرۋى كەرەكتىگىن ايتقان ەدى.

ايتا كەتەيىك، رەسەيلىك ساياساتتانۋشى دروبنيتسكيدىڭ «كەلەسى ماسەلە قازاقستان بولۋى مۇمكىن. ويتكەنى، ۇلتشىلدىق ۇردىستەرى سول جەردە دە باستالۋى ىقتيمال» دەگەن پىكىرى «روسسيا 1» ارناسىنداعى سولوۆيەۆتىڭ شوۋىندا ايتىلعان بولاتىن.

سوڭعى جاڭالىقتار