اۋىلداردى دامىتۋعا بولىنگەن قاراجات سوماسى بەلگىلى بولدى

استانا. قازاقپارات - بۇگىن سەناتتىڭ جالپى وتىرىسىندا ق ر پرەمەر- ءمينيسترىنىڭ ءبىرىنشى ورىنباسارى رومان سكليار «اۋىل - ەل بەسىگى» جوباسىن ىسكە اسىرۋ بارىسى جايىندا ايتتى، دەپ حابارلايدى قازاقپارات ءتىلشىسى.

«ەلىمىزدە 6293 اۋىل بار جانە بۇل ەلدى مەكەندەردە 8 ميلليونعا جۋىق ادام تۇرادى. بۇل ءوز كەزەگىندە حالقىمىزدىڭ 41 پايىزىنا تەڭ. 2019 -جىلدان باستاپ «اۋىل - ەل بەسىگى» جوباسى جۇزەگە اسىرىلىپ جاتىر. ونىڭ ماقساتى - الەۋەتى بار 3,5 مىڭ اۋىلدا ينفراقۇرىلىمدى دامىتۋ. 2019-2021 -جىلدارى بۇل جوباعا 200 ميلليارد تەڭگە ءبولىندى. وسى قاراجات ەسەبىنەن 665 اۋىلدا ءتيىستى ينفراقۇرىلىم جاسالدى»، - دەدى ر. سكليار.

ونىڭ ايتۋىنشا، اۋىلدىڭ جاعدايىن جاقسارتۋعا جەكە ينۆەستورلار دا ۇلەس قوسىپ جاتىر. 2019 -جىلدان باستاپ ولار 57 ميلليارد تەڭگە قاراجات سالىپ، 2 مىڭعا جۋىق جوبانى ىسكە اسىردى. بيىل «اۋىل - ەل بەسىگى» جوباسىنا 128 ميلليارد تەڭگە ءبولىندى. بۇل قاراجات 576 اۋىلعا باعىتتالىپ وتىر. 2023 -جىلى 140 ميلليارد تەڭگە ءبولىنىپ، 663 اۋىل قامتىلماق.

«اۋىل حالقىنىڭ ەڭ باستى پروبلەماسى - جۇمىسپەن قامتۋ. بۇل باعىتتا نە ىستەپ جاتىرمىز؟ «باستاۋ- بيزنەس» جوباسى بويىنشا 66 مىڭ ادامدى كاسىپكەرلىككە ۇيرەتتىك، ءوز كاسىبىن اشۋ ءۇشىن 10 مىڭ اۋىل تۇرعىنى 50 ميلليارد ميكروكرەديت الدى، ياعني 6 پايىزبەن 7 جىلعا دەيىن. جاقىندا جامبىل وبلىسىندا ءبىر پيلوتتىق جوبانى ىسكە اسىردىق. ول بويىنشا الەۋمەتتىك كاسىپكەرلىك پالاتا ارقىلى اۋىل تۇرعىندارىنىڭ كاسىبىنە 2,5 پايىزدىق نەسيە بەرىلدى. پيلوتتىڭ جوبا جاقسى ناتيجە بەردى. سوندىقتان كەلەسى جىلى ونى بارلىق وڭىرگە تاراتامىز. وعان 52 ميلليارد تەڭگەدەن استام بولىنەدى. سونىڭ ەسەبىنەن 11 مىڭ جۇمىس ورنى اشىلادى دەپ جوسپارلاپ وتىرمىز»، - دەدى ر. سكليار.