ەمىزۋلى سابيىمەن تاكسي بولعان استانالىق ايەلگە پاتەر بەرىلەدى

استانا. قازاقپارات - بەس ايلىق بالاسىمەن تاكسي جۇرگىزۋشىسى بولىپ جۇمىس ىستەگەن استانالىق ايەلدىڭ وقيعاسى جاقسى اياقتالدى.

ول ەندى تاكسي جۇرگىزبەيدى، ونىڭ ايىپپۇلى الىپ تاستالعان. سونداي-اق، جەلتوقساندا پاتەر بەرىلەدى، - دەپ حابارلايدى Tengri Lifestyle.

«ءبىز بىرگەمىز» قوعامدىق قورىنىڭ باسشىسى پەريزات قايرات جەلىدە استانالىق ايەل تۋرالى ۆيدەو پايدا بولعاننان كەيىن تۇرعىن ءۇي ماسەلەسىن شەشۋ ءۇشىن ءتۇرلى قۇرىلىس كومپانيالارىمەن بايلانىسقان.

«اقتوبەدەن كەلگەن مەتسەنات ءمولدىر سۇيىنشىاليمەن بايلانىسقا شىقتىق. ول استانادا جەكە ۇيلەر سالىپ جاتىر. ءبىر اي بۇرىن ول ءبىزدىڭ قورعا جاڭا تۇرعىن ءۇي كەشەنىنەن پاتەر بەردى. الەۋمەتتىك جەلىلەردەن اسەلدىڭ ۆيدەوسىن كوردىم. مولدىرگە بۇل پاتەردى اسەلگە سىيعا تارتۋدى ۇسىندىم. ول كەلىستى»، - دەدى ول.

پاتەردى اسەل جەلتوقساندا رەسمي تۇردە الادى، ول بەس ايلىق قىزى، 12 جاستاعى ۇلىمەن بىرگە تۇراتىن جاتاقحانادان كوشەدى.

ايەل قايىرىمدىلىق قورىنا جانە كوپتەن كۇتكەن پاتەردى الۋعا كومەكتەسكەن قازاقستاندىقتارعا العىسىن ءبىلدىردى.

«قانداي باقىت، سەنە الار ەمەسپىن. كوپ راقمەت. مەن بۇعان ءالى سەنبەي تۇرمىن. بالالارىممەن بىرگە كىرەبەرىستە تۇنەيتىن كۇندەر دە بولعان. كۇندىز پاتەر ىزدەيتىن ەدىم، ءبىراق ەشكىم ماعان پاتەر بەرمەدى، ويتكەنى كىشكەنتاي بالالارىم بولدى. مەن وتە ريزامىن. سىزدەر سياقتى مەيىرىمدى ادامدارعا كوپ راقمەت»، - دەدى استانالىق ايەل.

سونداي-اق، قور ءتوراعاسى اسەل بۇدان بىلاي تاكسي جۇرگىزبەيتىنىن ايتتى. ول كولىك استانا قالالىق تاكسوپاركىنە تيەسىلى ەكەنىن جانە پوليتسيا دەپارتامەنتى «سەرگەك» كامەرالارىنان تۇسكەن بارلىق ايىپپۇلدى الىپ تاستاعانىن جەتكىزدى. قازىر پەريزات ايەلدىڭ جاڭا پاتەرىنە جوندەۋ جۇرگىزۋگە كومەكتەسۋ ءۇشىن كوبىرەك دەمەۋشى ىزدەپ جاتىر.

ەسكە سالايىق، بۇعان دەيىن ءسابيىن الدىنا الىپ تاكسي بولىپ جۇرگەن كەلىنشەك قازنەتتى ءتانتى ەتكەنى حابارلانعان بولاتىن.