قىتايدا قازاقستاندىق تۇيە سۇتىنە سۇرانىس ارتىپ كەلەدى - شەتەلدەگى قازاقشا باسپا سوزگە شولۋ

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

تۇرىك ەلىنىڭ باس قالاسىندا قازاق كورمەسى ءوتتى- TRT

انكارا قالاسىندا قازاقتىڭ ءداستۇرلى قولونەرىنىڭ تاڭداۋلى ۇلگىلەرىنەن قۇرالعان كورمە اشىلدى، دەپ حابارلايدى تۇركيا راديو تەلەۆيزيا پورتالى.

اتالعان ب ا ق- تىڭ دەرەگىنشە، تۇركيانىڭ انكارا قالاسىندا «كوك تۋ» قازاق مادەنيەتى قوعامى جانە تۇرىك مادەنيەتىنىڭ حالىقارالىق ۇيىمى تۇركسويدىڭ ۇيىمداستىرۋىمەن، قازاقستان رەسپۋبليكاسىنىڭ تۇركياداعى ەلشىلىگىنىڭ قولداۋىمەن «بابالار مۇراسى» اتتى شىعارماشىلىق كورمە اشىلدى.

TRT- نىڭ كەلتىرگەن دەرەگىنە سۇيەنسەك، ادنان وتۇكەن اتىنداعى قالالىق كىتاپحانانىڭ زالىندا وتكەن كورمەدە قازاقستان رەسپۋبليكاسىنىڭ كوركەم ەڭبەك ءپانى ۇستازدارى مەن كاسىبي سۋرەتشىلەرى كودەكوۆ قاناعات، كۋلجابايەۆ ەسەنكەلدى، بوستان ايبەك، ەستەۋسىز توعجان، اقىلباي ايگەرىم جانە قاليەۆا توميريستىڭ ەڭبەكتەرى تانىستىرىلعان.

ايتا كەتەيىك، قازاق قولونەر جانە بەينەلەۋ ونەرى مايتالماندارىنىڭ تۋىندىلارىن تاماشالاۋعا تۇركياداعى قانداستار، قازاقستاندىق ستۋدەنتتەر، تۇرىك زيالى قاۋىم وكىلدەرى مەن انكارا تۇرعىندارى كەلدى.

شىعىس قىتاي پەداگوگيكا ۋنيۆەرسيتەتىندە قازاقستان زەرتتەۋ ورتالىعى قۇرىلدى - حالىق گازەتى

جاقىندا شىعىس قىتاي پەداگوگيكا ۋنيۆەرسيتەتىنىڭ قازاقستان زەرتتەۋ ورتالىعى رەسمي تۇردە قۇرىلدى. شىعىس قىتاي پەداگوگيكا ۋنيۆەرسيتەتى رەكتورىنىڭ ورىنباسارى گۋ حۋنليان مەن قازاقستان رەسپۋبليكاسىنىڭ شانحايداعى باس كونسۋلى راحىمجان راحيموۆ ورتالىقتىڭ اشىلۋ ءراسىمىن جاسادى.

بۇل تۋرالى وسى اپتادا قىتايدىڭ «حالىق گازەتى» اقپارات پورتالى حابارلادى.

اتالعان ب ا ق- تىڭ مالىمەتىنشە، راحىمجان راحيموۆ كوپشىلىكتى قازاقستان زەرتتەۋ ورتالىعىنىڭ قۇرىلۋىمەن قۇتتىقتاعان. سونداي-اق باس كونسۋل ورتالىق قىتاي مەن قازاقستان اراسىنداعى ءبىلىم الماسۋدىڭ ماڭىزدى پلاتفورماسىنا اينالاتىنىنا سەنىم ءبىلدىردى.

«حالىق گازەتى» پورتالىنىڭ حابارلاۋىنشا، گۋ حۋنليان ورتالىقتىڭ قۇرىلۋى الداعى ۋاقىتتا ەكى ەل اراسىنا دانەكەر بولىپ، شىعىس قىتاي پەداگوگيكالىق ۋنيۆەرسيتەتى مەن قازاقستاندىق ۋنيۆەرسيتەتتەر اراسىنداعى عىلىمي زەرتتەۋلەر مەن جاس عالىمداردى دايارلاۋ سالاسىنداعى تىعىز الماسۋلار مەن ىنتىماقتاستىققا ىقپال ەتەتىنىن اتاپ وتكەن.

شەتەلدىكتەرگە وزبەكستان ازاماتتىعىن بەرۋدىڭ جاڭا ەرەجەسى جاريالاندى – ءو ز ا

وزبەكستاندىق نورماتيۆتىك- قۇقىقتىق قۇجاتتار جوبالارىن تالقىلاۋ پورتالىندا «وزبەكستان رەسپۋبليكاسىنىڭ ازاماتتىعى تۋرالى» ءو ر زاڭىنا تولىقتىرۋ ەنگىزۋ تۋرالى» زاڭى جاريالاندى.

بۇل زاڭ ءىرى كولەمدە تىكەلەي ينۆەستيتسيا سالعان شەتەلدىك ينۆەستورلارعا وزبەكستان ازاماتتىعىن بەرۋدى قاراستىرادى.

بۇل تۋرالى وسى اپتادا وزبەكستاندىق «ءو ز ا» اقپارات اگەنتتىگى حابارلادى.

زاڭ جوباسىنا سايكەس، وزبەكستان ازاماتتىعىن قابىلداۋدىڭ وڭايلاتىلعان ءتارتىبى وزبەكستاندا جۇزەگە اسىرىلاتىن ينۆەستيتسيالىق جوبالارعا كەمىندە 1 ميلليون ا ق ش دوللارى بالاماسىن ينۆەستيتسيالاعان شەت مەملەكەتتىڭ ازاماتى نەمەسە ازاماتتىعى جوق تۇلعا بولىپ تابىلاتىن جەكە تۇلعاعا نەمەسە بەلگىلى عالىم، سپورتشى، مادەنيەت جانە ونەر قايراتكەرىنە قولدانىلادى.

«باعالى قاعازداردىڭ ورتالىق دەپوزيتارييى» مۋك نەمەسە مەملەكەتتىك قىزمەت كورسەتۋ ورتالىعى بەرگەن شەتەل مەملەكەتىنىڭ ازاماتى نەمەسە ازاماتتىعى جوق تۇلعا وزبەكستان رەسپۋبليكاسىندا جۇزەگە اسىرىلاتىن ينۆەستيتسيالىق جوبالارعا كەمىندە 1 ميلليون اقش دوللارىن ينۆەستيتسيالاعانىن راستايتىن انىقتاما بەرەدى» دەپ جازادى «ءو ز ا».

قىتايدا قازاقستاندىق تۇيە سۇتىنە سۇرانىس ارتىپ كەلەدى - حالىق گازەتى

قىتايدىڭ V حالىقارالىق يمپورت كورمەسىندەگى قازاقستان ستەندىندە سۋسىنداردىڭ، ءسۇت ونىمدەرىنىڭ، بالدىڭ جانە دامدەۋىشتەردىڭ الۋان ءتۇرى كورگەن جۇرتتى تاڭ قالدىرادى. سونىڭ ىشىندە تۇيە ءسۇتى ۇنتاعى كوزگە ەرەكشە كورىندى، دەپ حابارلايدىڭ قىتايدىڭ «حالىق گازەتى» اقپارات پورتالى.

«قازاقستاندىق ءسۇت كومپانيالارى ءۇشىن قىتاي نارىعى بيزنەسكە ۇلكەن مۇمكىندىكتەر اشادى»، - دەدى ستەندكە جاۋاپتى الىبەك سمايىلوۆ قىتايلىق جۋرناليستەرگە بەرگەن سۇحباتىندا.

قىتايلىق ب ا ق- تىڭ مالىمەتىنشە، تۇيە ءسۇتى ۇنتاعىنىڭ تاعامدىق قۇندىلىعىن باعالايتىن قىتايلىق تۇتىنۋشىلاردىڭ سانى ارتىپ كەلەدى، نارىق كولەمى دە بارعان سايىن كەڭەيۋدە. قازىرگى ۋاقىتتا ولار كوپتەگەن كليەنتتەرمەن ساتىپ الۋ تۋرالى كەلىسىمدەرگە قول جەتكىزدى.

قازاقستاندىق ستەندكە جاۋاپتى قىزمەتكەر قازاقستاندا جوعارى ساپالى تۇيە ءسۇتى وندىرىلەتىنىن ايتقان. سونداي-اق قازاقستانداعى تۇيە ءسۇتى ۇنتاعىن وندىرەتىن كومپانيانىڭ باسشىسى وزدەرىنىڭ 20 ستاندارتتالعان ءسۇت ستانتسياسى مەن تولىق اۆتوماتتى ءوندىرىسى بار يندۋستريالدى پارك قۇرعانىن، قىتاي نارىعى وزدەرى ءۇشىن وتە كەڭ الاڭ ەكەندىگىن تىلگە تيەك ەتكەن.

قىتايلىق باسىلىمنىڭ كەلتىرگەن مالىمەتىنە سۇيەنسەك، قازاقستاندىق كاسىپكەر ق. مەيرامبەكوۆ نەگىزىن قالاعان «QAZBOTA» تۇيە ءسۇتى ۇنتاعى برەندى 2018-جىلى قىتايدىڭ I حالىقارالىق يمپورت كورمەسىنە قاتىسقاننان بەرى ونىڭ تانىمالدىعى ارتىپ كەلەدى.

«QAZBOTA» قىتاي يمپورت كورمەسى پلاتفورماسىنىڭ ارقاسىندا قىتايدا ىنتىماقتاستىق اگەنتتەرىن تاپقان. وسى جىلدىڭ ءبىرىنشى جارتىجىلدىعىندا كومپانيا قىتايدا بىرنەشە ءىرى ەلەكتروندىق كوممەرتسيا پلاتفورمالارىندا فلاگماندىق دۇكەندەر اشتى جانە اي سايىنعى ساتىلىمدارى تۇراقتى تۇردە وسكەن.

الىبەك سمايىلوۆتىڭ ايتۋىنشا، قازاقستانداعى كومپانيالاردىڭ ءبىرقاتار باسشىلارى جىل سايىن كورمەدە كوپتەگەن جاڭا كليەنتتەرمەن كەلىسىمشارتقا قول قويادى. ياعني، كورمە الەمدىك كومپانيالار ءۇشىن كوبىرەك مۇمكىندىكتەر تۋعىزادى.

استانا مەن الماتىدا قازاقستان-يران ەكونوميكالىق فورۋمى ءوتتى - Parstoday

استانا مەن الماتىدا ينجەنەرلىك- تەحنيكالىق قىزمەتتەردى ەكسپورتتاۋ سالاسىنداعى 15 تەن اسا يراندىق كومپانيا وكىلدەرى مەن ماڭىزدى قازاقستاندىق كومپانيالار جانە مەملەكەتتىك قايراتكەرلەردىڭ قاتىسۋىمەن قازاقستان-يران ەكونوميكالىق فورۋمى ءوتتى.

بۇل تۋرالى وسى اپتادا يراننىڭ Parstoday اقپارات اگەنتتىگى حابارلادى.

بۇل فورۋمدا الدىمەن ي ي ر- نىڭ الماتىداعى باس كونسۋلى موحسەن فوعاني تەھراندا يران مەن قازاقستانىڭ ەكونوميكالىق ىنتىماقتاستىعى ورتاق كوميسسياسىنىڭ 17- وتىرىسى وتكەنىن جانە ق ر پرەزيدەنتى قاسىم-جومارت توقايەۆتىڭ تەھرانعا ساپارى تۋرالى ايتقان. سونىمەن قاتار، يران ازاماتتارىنا قازاقستانعا بارۋ ءۇشىن 14 كۇنگە ۆيزاسىز رەجيم ورناعانىنا توقتالىپ، مۇنى ەكىجاقتى قارىم-قاتىناستاعى بەتبۇرىس نۇكتەسى دەپ اتاعان.

اتالعان وتىرىستا الماتى وبلىسىنىڭ وڭىرلىك دامۋ ورتالىعىنىڭ ديرەكتورى شىڭعىس ماقاشيەۆ وسى وبلىستىڭ ءتۇرلى سالالارداعى الەۋەتتەرىن بايانداپ، ساۋدا-ەكونوميكالىق بەلسەندىكتەردىڭ باستى باعىتتارى رەتىندە تۋريزم، قۇرىلىس، فارماتسيەۆتيكا، ترانزيت، اۋىل شارۋاشىلىعى، قايتا قالپىنا كەلەتىن قۋات كوزدەرى جانە ازىق-تۇلىك ءوندىرىسىن اتادى.

يراندىق دەلەگاتسيا الماتىمەن قوسا، استاناعا ساپار شەگىپ، استانا حالىقارالىق قارجى ورتالىعىندا وتكەن قازاقستان-يران ەكونوميكالىق فورۋمىنا قاتىستى.

قازاقستان مەن تۇركيا اراسىندا رەيس سانى ارتتى - TRT

قازاقستاننىڭ تۇركيامەن اۆياتسيا سالاسىنداعى ىنتىماقتاستىعى كەڭەيىپ كەلەدى. 1- قاراشادان باستاپ قازاقستاننىڭ الماتى قالاسىنان تۇركيا ەلورداسى انكاراعا تىكەلەي اۋە رەيسى ۇشادى. قازاقستاندىق «ەير استانا» اۋە كومپانياسى دا تۇركياعا رەيستەردىڭ كوبەيگەنىن مالىمدەگەن.

بۇل تۋرالى وسى اپتادا تۇركيا راديو تەلەۆيزيا پورتالى حابارلادى.

اتالعان ب ا ق- تىڭ دەرەگىنشە، الماتى مەن انكارا اراسىندا اپتاسىنا ەكى رەت، سارسەنبى جانە سەنبى كۇندەرى تۇراقتى رەيستەر ورىندالادى. رەيستەردى تۇركيانىڭ اۋە كومپانيالارى ۇيىمداستىرادى.

قازاقستان ازاماتتىق اۆياتسيا كوميتەتى رەيس سانىن ودان ءارى ارتتىرۋ جانە گەوگرافيالىق رەيستەردى كەڭەيتۋگە كۇش-جىگەر جۇمسالعانىن مالىمدەگەن.

مالىمدەمەدە اتىراۋدان ىستانبۇلعا رەيس اپتاسىنا ەكىدەن ۇشكە، ال استانادان ىستانبۇلعا اپتاسىنا 7 رەيسكە دەيىن ۇلعاياتىنى ايتىلدى.

اۆتور بەيسەن سۇلتان