پايدالى كەن ورىندارىن زاڭسىز ۇلەستىردى دەگەن كۇدىكپەن بۇرىنعى ۆيتسە- مينيستر ۇستالدى

استانا. قازاقپارات - سىبايلاس جەمقورلىققا قارسى قىزمەت باس پروكۋراتۋرامەن بىرلەسىپ پايدالى قازبالار كەن ورىندارىن بەرۋدىڭ زاڭدىلىعىن تەكسەرۋ ناتيجەسى بويىنشا يندۋستريا جانە ينفراقۇرىلىمدىق دامۋ مينيسترلىگىنىڭ لاۋازىمدى تۇلعالارىنا قاتىستى سوتقا دەيىنگى تەرگەۋدى باستادى، دەپ حابارلايدى قازاقپارات.

مينيسترلىكتىڭ لاۋازىمدى ادامدارى جەكەلەگەن كاسىپكەرلىك سۋبەكتىلەرىنىڭ مۇددەسىندە ارەكەت ەتە وتىرىپ، بارلاۋ سىلتاۋىمەن اۋكسيون وتكىزبەستەن پايدالى قاتتى قازبالار قورى بەلگىلەنگەن كەن ورىندارىن زاڭسىز بەرگەنى انىقتالدى.

بۇرىن جۇرگىزىلگەن بارلاۋ فاكتىسى قۇجاتتاردى بۇرمالاۋ ارقىلى ادەيى جاسىرىلعان.

ناتيجەسىندە لاۋازىمدى تۇلعالارمەن ۇلەستەس كاسىپكەرلەر قول قويۋ بونۋسىنىڭ ەڭ تومەنگى قۇنى ءۇشىن نارىققا قاتىسۋشىلاردىڭ باسەكەلەستىك، قولجەتىمدىلىك جانە تەڭ قۇقىقتىلىق قاعيداتتارىن بۇزا وتىرىپ، وندىرۋگە دايىن كەن ورىندارىن الدى.

كەن ورىندارىن ساتۋ بويىنشا اۋكتسيوندار وتكىزىلمەگەندىكتەن، مەملەكەت ونداعان ميلليارد تەڭگە الماعان.

7- قاراشادا لاۋازىمدىق وكىلەتتىگىن اسىرا پايدالاندى دەگەن كۇدىكپەن بۇرىنعى يندۋستريا جانە ينفراقۇرىلىمدىق دامۋ ۆيتسە- ءمينيسترى ت. توقتابايەۆ ۇستالدى.

«تەرگەۋ سوتتىڭ سانكسياسىمەن ت. توقتابايەۆتىڭ جانە ونىڭ جاقىن تۋىستارىنىڭ (ەليتالىق جەكە ۇيلەر، جەر ۋچاسكەلەرى، Cadillac Escalade ماركالى اۆتوكولىكتەرى،

Mercedes-Benz Maybach S580 4 Matic, екі BMW X5 Xdrive40I, Bentley Bentayga V8)

قىمبات جىلجىمالى جانە جىلجىمايتىن مۇلكى انىقتالدى جانە قاماۋعا الىندى. تەرگەۋ جالعاسىپ جاتىر. تەرگەۋ مۇددەسى ءۇشىن وزگە اقپارات جاريالانبايدى» دەپ ءمالىم ەتتى اگەنتتىك.

ايتا كەتەيىك، تيمۋر توقتابايەۆ 2019 -جىلدىڭ اقپان- جەلتوقسان ايلارى ارالىعىندا يندۋستريا جانە ينفراقۇرىلىمدىق دامۋ ۆيتسە- ءمينيسترى قىزمەتىن اتقارعان.

رەداكتور

جانات قاپالبايەۆا