ليفتىدە ايەلىن ءولىمشى ەتىپ ساباعان استانالىق جىگىتكە سوت ۇكىمى شىقتى
بۇگىن استانا قالاسى ەسىل اۋدانىنىڭ 2№ سوتى ب- عا قاتىستى جۇبايى ج- نىڭ دەنساۋلىعىنا اسا قاتىگەزدىكپەن بىرنەشە رەت ورتاشا اۋىر زيان كەلتىرۋ جانە جۇكتى ايەلدى ۇرىپ-سوعۋ فاكتىسى بويىنشا ايىپتاۋ ۇكىمىن شىعاردى.
ايتا كەتسەك، سوتقا دەيىنگى تەرگەۋ بارىسىندا تاعىلعان ايىپقا ساي ب. 2018-2020-جىلدار ارالىعىندا جۇبايىنىڭ جۇكتى جانە ونىڭ ماتەريالدىق تاۋەلدى ەكەنىن بىلە وتىرىپ، وعان فيزيكالىق جانە پسيحيكالىق ازاپ كورسەتكەن.
«بيىل 28- ناۋرىزدا ب. ليفتىدە ماس كۇيىندە ايەلىن اسا قاتىگەزدىكپەن ۇرىپ-سوعىپ، تەپكىلەگەن. وسىلايشا ايەلىنىڭ دەنساۋلىعىنا ورتاشا اۋىر زيان كەلتىرىلدى. وقيعا ليفتىنىڭ بەينەباقىلاۋ كامەراسىنا ءتۇسىپ قالعان»، - دەپ حابارلايدى ەلوردا سوتىنان.
سونداي-اق، ەسىل اۋدانىنىڭ 2№ سوتى ايىپتى كىناسىنىڭ قالاي دالەلدەنگەنىن ءتۇسىندىردى:
- جابىرلەنۋشى مەن كۋاگەرلەردىڭ ايعاقتارىمەن؛
- سوت ساراپتامالارىنىڭ قورىتىندىسىمەن؛
- بەينەجازبامەن؛
- سوتتالۋشى مەن جابىرلەنۋشى اراسىنداعى حات الماسۋمەن دالەلدەندى.
رەسمي حابارلامادا ايتىلعانداي، ب- نىڭ قىلمىستىق جاۋاپكەرشىلىگى مەن جازاسىن جەڭىلدەتەتىن جانە اۋىرلاتاتىن ءمان-جاي انىقتالماعان.
ياعني ق ر ق ك 107-بابىنىڭ 2-بولىگىنە سايكەس ايىپپۇل سالۋ، تۇزەۋ جانە قوعامدىق جۇمىس نەمەسە 3 جىلعا دەيىن باس بوستاندىعىنان ايىرۋ جازاسى كوزدەلگەن.
سونىمەن قاتار، ق ر ق ك 110-بابى 2-بولىگىنىڭ سانكسياسىمەن باس بوستاندىعىن شەكتەۋ نە 4 جىلدان 7 جىلعا دەيىن باس بوستاندىعىنان ايىرۋ جازاسى قاراستىرىلعان.
«سوتتالۋشىنىڭ كىناسى دالەلدەنگەندىكتەن، سوت وعان ق ر ق ك 107-بابى 2-بولىگىنىڭ 3,7) تارماقتارى جانە 110-بابى 2-بولىگىنىڭ 1,3) تارماقتارى بويىنشا 4 جىل 8 ايعا باس بوستاندىعىنان ايىرۋ جازاسىن تاعايىندادى. ودان بولەك، جابىرلەنۋشىنىڭ پايداسىنا ب- دان 2 ميلليون تەڭگە سوماسىندا مورالدىق جانە 4 ميلليون تەڭگەدەن استام مولشەردە ماتەريالدىق زالال ءوندىرىلدى»، - دەپ جازىلعان سوت ۇكىمىندە.
سوت ۇكىمى زاڭدى كۇشىنە ەنگەن جوق.
ەسكە سالا كەتسەك، بيىل مامىر ايىندا ەلوردا پوليتسياسى ليفت ىشىندە ايەلدى سوققىعا جىققان ەر ادامعا قاتىستى قىلمىستىق ءىس قوزعالىپ، تەرگەۋ امالدارى ءجۇرىپ جاتقانىن حابارلاعان ەدى.