قازاقستان ۇكىمەتى التىن وردا بويىنشا عىلىمي جانە مادەني جوبالارعا قولداۋ كورسەتەدى

None
استانا. قازاقپارات - جەزقازعاندا «التىن وردانىڭ تاريحي- مادەني مۇراسى» اتتى حالىقارالىق عىلىمي- پراكتيكالىق كونفەرەنسيا ءوتتى. وعان الەمنىڭ جەتەكشى عالىمدارى، كورنەكتى مەملەكەت جانە قوعام قايراتكەرلەرى قاتىستى.

بۇل تۋرالى قازاقپارات ق ر مادەنيەت جانە سپورت مينيسترلىگىنىڭ رەسمي سايتىنا سىلتەمە جاساپ حابارلايدى.

تاريحشىلار، مەملەكەت قايراتكەرى جانە تالانتتى اسكەري قولباسشى «الەمدى ءدۇر سىلكىندىرگەن» ۇلىق ۇلىستىڭ ۇلى بيلەۋشىسىنىڭ ۇلكەن ۇلى جوشى حاننىڭ ساياسي مۇراسىنىڭ ماڭىزدى ءرولىن اتاپ كورسەتتى.

مادەنيەت جانە سپورت ءمينيسترى داۋرەن ابايەۆ عىلىمي ديسكۋرستا قاي ەلدى، قاي ەتنوس پەن قاي حالىقتى يمپەريانىڭ تىكەلەي مۇراگەرى دەپ اتاۋعا لايىق ەكەندىگى تۋرالى داۋ- داماي ءجيى كەزدەسەتىنىن اتاپ ءوتتى. بۇل رەتتە التىن وردا كەڭىستىگىندە قازاق مەملەكەتتىلىگىنىڭ ساياسي، مادەني، ەتنو- تىلدىك جانە شارۋاشىلىق- ەكونوميكالىق نەگىزدەرى جيناقتالعانىن ايتقان ءجون.

«وردا ىدىراعاننان كەيىن ۇلكەن ەۋرازيالىق كەڭىستىكتە قازاق، استراحان، ءسىبىر، قازان، حيۋا، بۇقارا، قاسىم حاندىقتارى، سونداي- اق نوعاي ورداسى پايدا بولدى. ارينە عىلىمي پىكىرتالاستاردىڭ بولعانى ءجون، ءبىراق سونىمەن قاتار باستى ماقسات پەن ميسسيا- تاريحي شىندىقتى ىزدەۋ ەكەندىگىن ۇمىتپاۋ ماڭىزدى. جانە دە ءبىز وسىناۋ ۇلى ۇلىستىڭ اياسىندا ونداعان حالىق بەيبىت قاتار ءومىر سۇرگەن، ساۋدا- ساتتىق جاساعان، قالالار سالعان وراسان زور يمپەريانىڭ مۇراسىن بولىسكە ءتۇسىرىپ جاتقاندا، تاريحي تار كەزەڭدەر تۋىپ، يدەولوگيا ويىنى باستالاتىنى ەستەن شىقپاۋ كەرەك»، - دەدى داۋرەن ابايەۆ.

مينيستر وسىدان تۋرا ءبىر جىل بۇرىن، سول كەزدەگى قاراعاندى وبلىسىنىڭ ۇلىتاۋ اۋدانىندا جۇمىس ساپارىمەن ءجۇرىپ، مەملەكەت باسشىسى التىن ورداعا ارنالعان حالىقارالىق عىلىمي كونفەرەنسيا وتكىزۋ تۋرالى باستاما كوتەرگەنىن ەسكە سالدى. قازىر جوشى حاننىڭ جەرلەنگەن جەرىنەن 70 شاقىرىم جەردە ورنالاسقان جەتەكشى عالىمدار جوشى ۇلىسىن زەرتتەۋگە ماماندانعان حالىقارالىق اكادەميالىق قوعامداستىقتىڭ قالىپتاسۋ پروتسەسىن جەدەلدەتەتىن جاھاندىق تاقىرىپتاردى كوتەرۋدە.

«ەڭ الدىمەن، التىن وردا ءوز زامانىنىڭ قۋاتتى جانە ەڭ ءىرى يمپەريالارىنىڭ ءبىرى بولعانىن، ونىڭ كەرەمەت مادەنيەتى، ادەمى قالالارى، مۇزداي قارۋلانعان قۋاتتى ارمياسى، ورنىقتى اكىمشىلىك قىزمەت جۇيەسى بار ەكەندىگىن ءتۇسىنۋ ماڭىزدى. ونىڭ اۋماعىندا ءارتۇرلى ءدىندى ۇستانعان، ءارتۇرلى تىلدە سويلەگەن كوپتەگەن حالىقتار بەيبىت ءومىر ءسۇردى. ولاردىڭ قاتار ءومىر ءسۇرۋى ورتا عاسىرلار ءۇشىن ديالوگ مادەنيەتىنىڭ، ءوزارا بايىتۋدىڭ، وزگەلەردى قۇرمەتتەۋدىڭ جانە كەمسىتپەۋدىڭ ەڭ سيرەك ۇلگىسىن كورسەتتى»، - دەپ اتاپ ءوتتى داۋرەن ابايەۆ.

مينيستر سونداي- اق قازاقستان ۇكىمەتى التىن ورداعا ارنالعان عىلىمي جانە مادەني جوبالاردى قولداۋدى جالعاستىراتىنىن ايتتى.

سوڭعى جاڭالىقتار