استانا ارداگەرلەرى «بايتەرەك» الاڭىنا جينالىپ، ءانۇران ورىندادى

None
استانا. قازاقپارات - استانا قالاسىندا ەلوردالىق «ارداگەرلەر ۇيىمى»، «اق كيمەشەك - كيەلىم» بەلسەندى ۇزاق ءومىر ءسۇرۋ ورتالىعىنىڭ ارداگەرلەرى، سول سياقتى اقجاۋلىقتى انالارىمىز جۇرتشىلىقتى رەسپۋبليكا كۇنىمەن قۇتتىقتاپ، پاتريوتتىق چەللەندجدى جالعاستىردى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

رەسپۋبليكا كۇنى اراعا كوپ جىلدار سالىپ حالقىمىزعا قايتا ورالعان ماڭىزدى مەرەكەلەردىڭ ءبىرى دە بىرەگەيى.

ۇلتتىق مەرەكە قارساڭىندا ەلوردا تورىندە جۇرت سۇيسىنەرلىك ءىس-شارا ءوتتى. تاۋەلسىزدىكتى تۋ ەتكەن اقجاۋلىقتى انالارىمىز، دانالىقتىڭ باستاۋى - ارداگەر اتا-اجەلەرىمىز «بايتەرەك» مونۋمەنتى الاڭىنا جينالىپ، ق ر مەملەكەتتىك ءانۇرانىن اۋەلەتە شىرقادى. اشىق اسپان استىندا تاۋەلسىزدىگىمىز بەن ەگەمەندىگىمىزدى جالىندى، جىگەرلى ۇنمەن جەتكىزە وتىرىپ، حالقىمىزدى رەسپۋبليكا كۇنىمەن قۇتتىقتادى.

ءىس-شارا سوڭى «اق كيمەشەك - كيەلىم» انالارىنىڭ ءتورايىمى، ءانشى، ق ر ەڭبەك سىڭىرگەن قايراتكەرى ارايلىم راحىم قىزىنىڭ اق تىلەگىمەن تۇيىندەلدى.

ايتا كەتەيىك، استانا قالاسىندا رەسپۋبليكا مەرەكەسىنە وراي پاتريوتتىق چەللەندج باستالعان بولاتىن.


سوڭعى جاڭالىقتار