رەسپۋبليكا كۇنى: ەلوردالىقتار بالكونعا قازاقستان تۋىن ءىلىپ جاتىر

استانا. قازاقپارات - قازاقستاندىقتار رەسپۋبليكا كۇنى قارساڭىندا وزدەرىنىڭ پاتريوتتىق سەزىمدەرىن ءبىلدىرۋ ماقساتىندا ءتۇرلى شارالار مەن فلەشموبتار ۇيىمداستىرۋدا، دەپ حابارلايدى قازاقپارات ءتىلشىسى.

ماسەلەن، قازىرگى تاڭدا ەلوردالىقتار وزدەرىنىڭ ۇيلەرىنىڭ بالكوندارىنا مەملەكەتتىك تۋدى ءىلىپ جاتىر. العاشقىلاردىڭ ءبىرى بولىپ مۇنداي باستامانى «جاستار رۋحى» جاستار قاناتى قولعا الدى. ولار قازاقستاندىقتاردى Instagram جەلىسىنە تۋمەن تۇسكەن فوتو نەمەسە ۆيدەوسىن جۇكتەپ، «جاستار رۋحى» پاراقشاسىن بەلگىلەۋگە شاقىردى.

«ءبىز 18-قازاندا «مەنىڭ ەلىم-مەنىڭ تۋىم» ونلاين-اكسياسىن باستادىق. سوعان ساي قازاقستاندىقتار وزدەرىنىڭ تۋمەن تۇسكەن فوتوسۋرەتتەرى مەن اڭگىمەلەرمەن ءبولىسۋ ءۇشىن حەشتەگ قوستىق. ءبىزدىڭ جاريالانىمعا قاتىستى كوپتەگەن قولداۋ پىكىرلەرى بولدى. مۇندايدى كۇتپەگەن ەدىك. ءبىز 19- قازاندا جاندوس قۇرمانبايەۆتىڭ بالكونعا تۋدى قالاي دۇرىس ءىلۋ كەرەكتىگىن تۇسىندىرگەن ۆيدەوسىن كوردىك. 2015-جىلى ول بالكونعا تۋ ءىلىپ قويعانى ءۇشىن جازالانعان ەدى. ءبىز جاندوسقا حابارلاسىپ، وعان قولداۋ بىلدىردىك. قازاقستاندىقتار ۇلتتىق مەرەكەنى سەزىنۋى ءۇشىن ءبىز وسىنداي شارا ۇيىمداستىرىپ وتىرمىز»، - دەدى «جاستار رۋحى» جاستار قاناتىنىڭ ءتوراعاسى نۇرجان جەتپىسبايەۆ.

جاندوس قۇرمانبايەۆتىڭ باستاماسىنا كوپتەگەن قازاقستاندىقتار قولداۋ ءبىلدىردى. وسى ورايدا «جاستار رۋحى» توبى دا اكسيانى جالعاستىرۋ تۋرالى شەشىم قابىلداعان. ول ءۇشىن ولار رەسپۋبليكا داڭعىلىن تاڭداپتى. وزدەرىنىڭ ايتۋىنشا، توپ مۇشەلەرى تۇرعىنداردىڭ ەسىگىن قاعىپ، ەلوردالىقتاردى اتالعان شاراعا قوسىلۋعا شاقىرۋدا. ۇسىنىستى قولداعاندارى بالكوندارىنا مەملەكەتتىك تۋدى ءىلىپ جاتىر.

ال الەۋمەتتىك جەلىدەگى چەللەندجدى بوكسشى سەرىك ساپيەۆ، اكتريسا قۇرالاي اناربەكوۆا، ازىلكەش تۇرسىنبەك قاباتوۆ سياقتى بەلىگىلى ونەر قايراتكەرلەرى قولدادى. «جاستار رۋحى» ۇيىمى بۇل شارانى 25- قازانعا دەيىن جالعاستىرماق نيەتتە.

ايتا كەتسەك، تاياۋدا بالكوندارعا مەملەكەتتىك تۋدى ىلۋگە رۇقسات بەرۋ ماقساتىنا «ق ر مەملەكەتتىك تۋدى پايدالانۋ تۋرالى» ۇكىمەت قاۋلىسىنا وزگەرىس ەنگىزىلگەن بولاتىن.