قوستانايلىق ساياحاتشى تۇركيا استاناسىنا ۆەلوسيپەدپەن جەتتى - فوتو
ول ءوزىنىڭ ۆەلومارافونىن ۇلت ۇستازى احمەت بايتۇرسىن ۇلىنىڭ 150 جىلدىعىنا ارنادى، دەپ حابارلايدى قازاقپارات ءتىلشىسى.
بىرنەشە كىتاپتىڭ اۆتورى، جۋرناليست، سپورتشى، اۋدارماشى جانە بەلسەندى ءومىر سالتىن ۇستاناتىن ەرنات مەلىس ۇلى 5-قىركۇيەكتە - ۇلى اعارتۋشى، قازاق ءتىل ءبىلىمىنىڭ نەگىزىن سالۋشى ا. بايتۇرسىن ۇلىنىڭ تۋعان كۇنىندە قازاقستاننان ۆەلوسيپەدپەن اتتاندى.
ول 17-قازاندا 4600 شاقىرىم جولدى ارتتا قالدىرىپ، تۇركيا استاناسىنا جەتتى. قوستانايدان شىعىپ، اۋەلى باتىس قازاقستانعا اتتاندى. ودان كەيىن وتانداسىمىز ازەربايجانعا بارۋدى جوسپارلاعان ەدى، ءبىراق بەلگىسىز سەبەپتەرمەن جابىق بولعان شەكارا ساياحاتشىنىڭ باعىتىن وزگەرتتى. تاعدىردىڭ جازۋىمەن شۋاقتى گرۋزيا ونىڭ جولىنداعى العاشقى شەت ەل بولدى.
وندا ول كۋتايسي، باتۋمي قالالارىنا ساياحاتتادى. ودان كەيىن ۆەلوشاباندوز قوناقجاي تۇركياعا بەت الىپ، قارا تەڭىزدەگى ريزە، ترابزون، گيرەسۋن، وردا جانە سامسۋن قالالارىنان ءوتىپ، چورۋم جانە كيريككالە قالالارى ارقىلى انكاراعا باعىت الدى. قازاقستاندىق ساياحاتشى كونيا، بۋرسا جانە ىستانبۇلعا اتتانىپ، ۆەلومارافونىن وسىندا اياقتاماق. ول ىستانبۇلعا 55-كۇنى جەتىپ، بارلىعى 5555 شاقىرىمدى ەڭسەرمەك.
تۇركيا استاناسىندا قازاقستاندىق ساياحاتشىنى جەرلەستەرى عانا ەمەس، جەرگىلىكتى تۇرعىندار دا ىستىق ىقىلاسپەن قارسى الدى. انكارا قالاسىنىڭ كەچيورەن اۋدانىندا ورنالاسقان قازاق ويشىلى اباي قۇنانبايەۆ ەسكەرتكىشى الدىندا قازاقستاننىڭ تۇركياداعى ەلشىلىگى مەن اۋدان اكىمدىگى بىرلەسە وتىرىپ، ساياحاتشىنىڭ كەلۋىنە وراي سالتاناتتى شارا ۇيىمداستىردى.
قوستانايلىق ۆەلوشاباندوز جولدا كەزىكتىرگەن جۇرتشىلىققا قازاقتىڭ ءبىرتۋار اقىنى احمەت بايتۇرسىن ۇلىنىڭ ءومىرى مەن شىعارماشىلىعى جايلى بايانداپ بەردى.
سونىمەن بىرگە، ول الەۋمەتتىك جەلىلەردە جولدا كەزدەسكەن ادامداردىڭ ءومىرى مەن سالتى تۋرالى جازبالار قالدىردى.
