ۋكراينانىڭ قازاقستانداعى ەلشىسى پەتر ۆرۋبليەۆسكي قىزمەتىنەن بوساتىلدى
ءتيىستى جارلىق ۋكراينا پرەزيدەنتىنىڭ رەسمي سايتىندا جاريالانعان.
«پەتر يۋريەۆيچ ۆرۋبليەۆسكي ۋكراينانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى قىزمەتىنەن بوساتىلسىن» دەلىنگەن جارلىقتا.
ەسكە سالا كەتەيىك، اتالعان ەلشى بلوگەرگە سۇحبات بەرگەننەن كەيىن قازاقستاننىڭ سىرتقى ىستەر مينيسترلىگىنە شاقىرىلعان بولاتىن.
قازاقستان رەسپۋبليكاسى سىرتقى ىستەر مينيسترلىگىىنىڭ ورىنباسارى ەرمۇحامبەت قونىسپايەۆ ۋكراينانىڭ قازاقستانداعى ەلشىسى پەتر ۆرۋبليەۆسكيمەن كەزدەستى.
«كەزدەسۋ بارىسىندا ەلشىگە بيىلعى 21-تامىزدا قازاقستاندىق بلوگەر دياس قۇزايىرعا بەرگەن سۇحباتىندا ايتقان مالىمدەمەلەرىنە بايلانىستى نارازىلىق ءبىلدىرىلدى. قازاقستان تاراپى مۇنداي مالىمدەمەلەردىڭ شەت مەملەكەت ەلشىسىنىڭ قىزمەتىنە ساي كەلمەيتىندىگى جانە قولايسىزدىعى تۋرالى ۇستانىمىن ءبىلدىردى. مۇنداي ءىس-قيمىلدار مەملەكەتتەر اراسىنداعى دوستىق قاتىناستارعا نۇقسان كەلتىرمەۋگە ءتيىس»، - دەلىنگەن ق ر س ءى م باسپا ءسوز قىزمەتىنىڭ مالىمەتىندە.
كەيىننەن وسىعان قاتىستى س ءى م رەسمي وكىلى ايبەك سمادياروۆ پىكىر ءبىلدىردى.
ونىڭ ايتۋىنشا، قازىرگى ۋاقىتتا ۋكراينا سىرتقى ىستەر مينيسترلىگىنەن استاناداعى جاڭا ەلشىنى تاعايىنداۋ تۋرالى ءوتىنىش تۇسكەن. ۋكراينا جاعىمەن وسى ماسەلە بويىنشا بىزدە تولىق تۇسىنىستىك بار جانە ەكى جاقتا دا بارلىق كەلىسىم ورىندالدى.