نورۆەگيا رەسەيدىڭ بالىق اۋلاۋ كەمەلەرىنە ترانزيتپەن وتۋگە شەكتەۋ قويدى

استانا. قازاقپارات- نورۆەگيا بيلىگى رەسەيدىڭ بالىق اۋلاۋ كەمەلەرىنە ءوز پورتتارى ارقىلى ترانزيتپەن وتۋگە شەكتەۋ قويدى، دەپ حابارلايدى «حابار 24».

سكانديناۆيالىق مەملەكەت وتكەن اپتادا «سولتۇستىك اعىن» قۇبىرلارىنداعى گازدىڭ جىلىستاۋ وقيعاسىنان كەيىن قاۋىپسىزدىك ماقساتىندا وسىنداي شەشىمگە كەلدى. وعان سايكەس رەسەيلىك كەمەلەر بۇدان بىلاي نورۆەگيانىڭ 3 پورتىنا عانا كىرىپ، ءجىتى تەكسەرىستەن وتەتىن بولادى.

اننيكەن حيۋيتفەلدت، نورۆەگيانىڭ سىرتقى ىستەر ءمينيسترى:

- نورۆەگيا سۋلارى مەن پورتتارىندا رەسەيدىڭ كەمەلەرى ءجىتى باقىلانادى. ءبىزدىڭ ەل رەسەيدىڭ زاڭسىز تاۋار تاسىمالىنا ترانزيتتىك جول بولماۋى ءۇشىن ءتيىستى شەكتەۋ شارالارىن ەنگىزىپ وتىر. ەندى بۇل ەلدىڭ بالىق اۋلاۋ كەمەلەرى كورولدىكتىڭ ترومسيە، كيركەنەس پەن بوتسفورد پورتتارىنا عانا كىرە الادى. ءارى ونداعى تەكسەرىستەر دە كۇشەيتىلەتىن بولادى.