قىتايدان كەلگەن ايگىلى بالۋان قالي مۇقاتاي ۇلى قايتىس بولدى
بالۋان شولاق پەن قاجىمۇقانداي ارىستاردى ومىرگە اكەلگەن قازاق، قاي زاماندا دا الەمدىك باسەكەلەردە ەل نامىسىن قورعايتىن باتىر ۇلداردان كەندە بولعان ەمەس. سونىڭ ءبىرى - قىتايداعى قازاققا عانا ەمەس، ميللياردتار ەلىنە كەڭىنەن تانىس، كەزىندەگى الامان جارىستىڭ بايگە بەرمەس ارىستانى اتانعان قالي مۇقاتاي ۇلى.
قالي مۇقاتاي ۇلى 1959 -جىلى ق ح ر شىڭجاڭ ولكەسى تارباعاتاي ايماعىنىڭ ءدوربىلجىن اۋدانىندا تۋعان.
1979 -جىلدان باستاپ مەملەكەتتىك جارىستارعا دۇركىن-دۇركىن ءتۇسىپ، بيىك تۇعىرلاردان كورىنگەن. ول قىتاي چەمپيوناتىندا ەركىن كۇرەس تۇرىنەن ورتا سالماقتا سەگىز مارتە باس جۇلدە، ءۇش مارتە قولا مەدال قانجىعالاپ، ۇلتىنىڭ مەرەيىن وسىرگەن ازامات.
سونداي-اق قالي مۇقاتاي ۇلى 1980-1983 -جىلدارى يران، پاكىستان، رۋمىنيا، يۋگوسلاۆيا، كانادا، ءۇندىستان، جاپونيا، تۇركيا ەلدەرىندە وتكەن حالىقارالىق جارىستاردا بەلدەسىپ، ۇلكەن الامانداردا تالاي مارتە توپ جارعان.
ول ش ۇ ا ر بالۋاندار كومانداسىندا اعا جاتتىقتىرۋشى، ءبىرىنشى دارەجەلى مەملەكەتتىك جۇلدەگەر جانە تورەشى دەگەن اتاق-ماراپاتتاردىڭ يەگەرى بولعان.
اۆتور
باقىتجول كاكەش