قاسىم- جومارت توقايەۆ: مەنىڭ ستراتەگيالىق ماقساتىم - جەمقورلىقتان تازا قوعام قۇرۋ

استانا. قازاقپارات - كەزەكتەن تىس پرەزيدەنت سايلاۋىندا قاسىم- جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيا فورۋمىندا ءسوز سويلەگەن ق ر پرەزيدەنتى ءوزىنىڭ ستراتەگيالىق ماقساتى تۋرالى ايتتى، دەپ حابارلايدى قازاقپارات ءتىلشىسى.

«ەلىمىزدىڭ دامۋىنا كەدەرگى كەلتىرىپ وتىرعان كەسەلدىڭ ءبىرى - سىبايلاس جەمقورلىق. ونىمەن كۇرەسۋ - بارشامىزعا ورتاق مىندەت. بۇل باعىتتا كەيىنگى ءۇش جىلدا ءبىراز شارۋا اتقارىلدى. مىسالى، وسىنداي قىلمىسى ءۇشىن سوتتالعانداردى مەرزىمىنەن بۇرىن شارتتى تۇردە بوساتۋعا تىيىم سالىندى. بۇدان بىلاي ولاردان قايتارىلعان قاراجات مەكتەپ سالۋعا جۇمسالادى»، - دەدى قاسىم- جومارت توقايەۆ.

پرەزيدەنت جەمقورلىقپەن كۇرەس ءتيىمدى بولۋ ءۇشىن مەملەكەتتىك ساتىپ الۋ جۇيەسىنە ءبىرقاتار وزگەرىس ەنگىزىلگەنىن اتاپ ءوتتى.

«سونداي- اق، قۇزىرلى ورگان باسشىلارىنىڭ جاۋاپكەرشىلىگى ارتتى. ءبىر سوزبەن ايتقاندا، جەمقورلىقپەن كۇرەس ەشقاشان توقتامايدى، جالعاسا بەرەدى»، - دەدى مەملەكەت باسشىسى.