پرەزيدەنت كەلەشەكتە «توقايەۆ كەزەڭىنە» قانداي باعا بەرىلەتىنى تۋرالى وي ءبولىستى

استانا. قازاقپارات - الداعى سايلاۋ ءبىزدىڭ جاڭا جەتىستىكتەرىمىزدىڭ نەگىزىن قالايتىنىنا، جاڭا ساياسي ءداۋىردىڭ تىرەگى بولاتىنىنا سەنىمدىمىن.

ونداعان جىلدار وتكەندە بۇل كەزەڭدى شىنايى بەتبۇرىستى شەشىمدەر مەن تۇبەگەيلى وزگەرىستەر ءداۋىرى رەتىندە ەسكە الادى. كەزەكتەن تىس پرەزيدەنت سايلاۋىندا قاسىم- جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيا فورۋمىندا سويلەگەن سوزىندە ق ر پرەزيدەنتى وسىلاي ءمالىم ەتتى، دەپ حابارلايدى قازاقپارات ءتىلشىسى.

«ءبىرىنشى ورىنعا ناقتى بىرەۋگە جانە كلاندارعا عانا باعىتتالعان مۇددەلەر ەمەس، قۋاتتى ساياسي ينستيتۋتتار مەن جالپىۇلتتىق باسىم باعىتتار شىعادى. بىزگە مىعىم پارلامەنتتىك ءداستۇرى بار پرەزيدەنتتىك رەسپبۋبليكا قاجەت.

سوندىقتان، «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» دەپ اتالاتىن مەملەكەتتىك قۇرىلىستىڭ نەگىزگى فورمۋلاسى ۇنەمى جاڭا ساپالى مازمۇنمەن تولىعىپ وتىرادى. الداعى سايلاۋ سيكلىندە پرەزيدەنت، ءماجىلىس جانە بۇكىل دەڭگەيدەگى ءماسليحاتتار سايلاۋى كەزەڭ- كەزەڭىمەن وتەدى. ناتيجەسىندە جاڭا ءادىل قاعيداتتار نەگىزىندە وسى بيلىك ينستيتۋتتارى ساپالى تۇرعىدا جاڭارتىلادى. بۇل رەفورمالاردىڭ بەلگىلەنگەن قارقىنىن ساقتاپ، جاڭا اۋقىمدى قايتا قۇرۋلارعا جول اشادى»، - دەدى قاسىم- جومارت توقايەۆ.

پرەزيدەنتتىڭ پايىمىنشا، ەلدە شۇعىل شەشۋدى تالاپ ەتەتىن وتە كوپ ماسەلە قوردالانعان.

«الداعى سايلاۋ ءبىزدىڭ جاڭا جەتىستىكتەرىمىزدىڭ نەگىزىن قالايتىنىنا، جاڭا ساياسي ءداۋىردىڭ تىرەگى بولاتىنىنا سەنىمدىمىن. ونداعان جىلدار وتكەندە بۇل كەزەڭدى شىنايى بەتبۇرىستى شەشىمدەر مەن تۇبەگەيلى وزگەرىستەر ءداۋىرى رەتىندە ەسكە الادى. مەن بۇعان سەنەمىن، ءتىپتى كوزىم جەتەدى»، - دەدى مەملەكەت باسشىسى.