توقايەۆ: وزىق ءبىلىم مەن قاجىرلى ەڭبەك قانا ەلدى تابىسقا جەتكىزەدى
بۇل تۋرالى ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«جاسامپازدىق - جاڭارۋ مەن جاڭعىرۋ جولى. ءبىزدىڭ باستى ماقساتىمىز - وتانىمىزدى وركەندەتۋ، مەملەكەتىمىزدى دامىتۋ. وزىق ءبىلىم مەن قاجىرلى ەڭبەك قانا ەلدى تابىسقا جەتكىزەدى. باسەكەگە قابىلەتىن ارتتىرۋعا مۇمكىندىك بەرەدى»، - دەدى مەملەكەت باسشىسى قاسىم-جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيانىڭ فورۋمىندا.
پرەزيدەنت قازىر عىلىم ەكونوميكانى جەدەل العا جەتەلەيتىن الىپ يندۋسترياعا اينالعانىن باسا ايتتى.
«قازاقستان جاھاندىق ەكونوميكاداعى ۇردىستەرعا ساي بولۋعا ءتيىس. بىزگە دە وسى عىلىمي-تەحنولوگيالىق جاڭاشىلدىقتى اكەلىپ، وندىرىسكە قوساتىن جاڭا ءارى بىلىكتى ماماندار كەرەك. ءبىز ولارعا قاجەت جاعدايدىڭ بارلىعىن جاسايمىز. سەبەبى، ادام كاپيتالى ەڭ قۇندى بايلىعىمىز. مۇنى ۋاقىت جانە تاجىريبە دالەلدەدى. وسىلايشا، قازاقستاننىڭ يننوۆاتسيانىڭ، جاڭا تەحنولوگيانىڭ، تىڭ يدەيالاردىڭ، اۋقىمدى كاپيتالدىڭ ورتالىعى بولۋعا زور مۇمكىندىگى بار»، - دەدى قاسىم-جومارت توقايەۆ.