ءبىر ادامنىڭ ۇزاق ۋاقىت بيلىكتە بولۋى دۇرىس ەمەس - قاسىم-جومارت توقايەۆ
«تاعى ءبىر باستاما - پرەزيدەنتتىڭ وكىلەتتىگىن 7 جىلدىق ءبىر مەرزىممەن شەكتەۋ. مەن وسى شەشىم تۋرالى كوپ ويلاندىم. ءبىر ادامنىڭ ۇزاق ۋاقىت بيلىكتە بولۋى دۇرىس ەمەس دەگەن تۇجىرىمعا كەلدىم.
مەملەكەتتىڭ تىرەگى - جالعىز پرەزيدەنت ەمەس، بۇكىل حالىق. سوندىقتان، ەل باسقارۋعا جاڭا بۋىن وكىلدەرىنىڭ كەلۋى وتە ماڭىزدى.
ءبىز ۇلت مۇددەسىن قورعايتىن جانە حالىققا ادال قىزمەت ەتەتىن ازاماتتارعا جول اشۋىمىز كەرەك. ناعىز مەملەكەتشىل، وتانشىل، بىلىكتى تۇلعالار جۇرتتى جاسامپاز ىستەرگە جۇمىلدىرىپ، قازاقستاندى وركەندەتە الادى. وسى ۇستانىم مىزعىماس قاعيداتىمىز بولۋعا ءتيىس»، - دەدى پرەزيدەنت.
مەملەكەت باسشىسى ەلىمىزدە دەموگرافيالىق احۋال جاقسارىپ كەلە جاتقانىن ايتا كەلىپ، «اڭساعان ءسابي» باعدارلاماسىنا توقتالدى.
«ۇلت ساۋلىعى - باستى بايلىعىمىز. 2020-جىلدان باستاپ مىندەتتى الەۋمەتتىك مەديتسينالىق ساقتاندىرۋ جۇيەسى قولدانىسقا ەنگىزىلدى. سونىڭ ارقاسىندا دەنساۋلىق ساقتاۋ سالاسىن قارجىلاندىرۋ 1,5 ەسە ارتتى.
مەديتسينالىق كومەكتىڭ ساپاسىن جاقسارتۋ ءۇشىن جۇيەلى جۇمىس اتقارىلىپ جاتىر. سونداي-اق، دەنە شىنىقتىرۋ سالاسىن دامىتۋعا ەرەكشە كوڭىل ءبولىنىپ وتىر. بۇقارالىق سپورتتى دامىتۋ، ءتۇرلى ۇيىرمەلەر اشۋ قاجەتتىگى تۋرالى مىندەت قويىلدى»، - دەدى قاسىم-جومارت توقايەۆ.