وركەنيەتتى ەل بولامىز دەسەك، ەڭبەكتى ەڭ باستى ورىنعا قويۋىمىز كەرەك - توقايەۆ

استانا. قازاقپارات - تاۋەلسىزدىك - ءبىز ءۇشىن ەڭ باستى قۇندىلىق.

بۇل تۋرالى ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«تاۋەلسىزدىك بارىنەن قىمبات. مەن بىلتىر وسى تۇجىرىم تۋرالى ارنايى ماقالا جاريالادىم. ءبىز ەگەمەندىگىمىزدى ساقتاي الساق قانا، ۇلت بولىپ، ەل بولىپ تۇرا الامىز. تاۋەلسىز مەملەكەت قانا ءوزىنىڭ ءتىلىن، جەرىن، ءدىنىن، ءدىلىن ساقتاپ قالادى. سوندىقتان، تاۋەلسىزدىك - ءبىز ءۇشىن ەڭ باستى قۇندىلىق. تاۋەلسىزدىكتى قورعاۋ جانە نىعايتۋ - ءاربىر ازاماتقا، بارىمىزگە ورتاق مىندەت! تاعى دا قايتالاپ ايتامىن. دامىعان، وركەنيەتتى ەل بولامىز دەسەك، ەڭبەكتى ەڭ باستى ورىنعا قويۋىمىز كەرەك»، - دەدى مەملەكەت باسشىسى قاسىم-جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيانىڭ فورۋمىندا.

پرەزيدەنت ەڭبەكقورلىق - وسكەلەڭ ۇرپاقتىڭ بويىنا سىڭگەن قاسيەت بولۋعا تيىستىگىن باسا ايتتى.

«بۇل قاسيەت ءبىزدىڭ ءومىر سالتىمىزعا اينالۋى كەرەك. ماسىلدىق نيەتتەن، بوس سوزدەن ارىلۋىمىز قاجەت. تاۋەلسىزدىكتى نىعايتۋعا ناقتى ىسپەن ۇلەس قوسۋ - ءار ازاماتتىڭ پەرزەنتتىك پارىزى. ەڭبەك ادامى ءبىزدىڭ قوعامدا قاشاندا قۇرمەتكە يە بولادى. سەبەبى، ەڭبەكقور ادام ءوز ءسوزىن ءاردايىم ىسپەن دالەلدەي الادى»، - دەدى قاسىم-جومارت توقايەۆ.