پرەزيدەنت: ءبىز ءۇشىن نەگىزگى باسىم باعىت - حالىقتىڭ ءال-اۋقاتىن ارتتىرۋ
6 قازان, 17:21

پرەزيدەنت: ءبىز ءۇشىن نەگىزگى باسىم باعىت - حالىقتىڭ ءال-اۋقاتىن ارتتىرۋ

استانا. قازاقپارات - كەزەكتەن تىس پرەزيدەنت سايلاۋىندا قاسىم-جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيا فورۋمىندا ءسوز سويلەگەن مەملەكەت باسشىسى حالىقتىڭ ءال-اۋقاتىن ارتتىرۋ باعىتىندا قولعا الىنعان شارالاردى اتادى، دەپ حابارلايدى قازاقپارات ءتىلشىسى.

«ءبىز ەكونوميكانى ساپالى دامىتىپ، ازاماتتاردىڭ ءومىر ءسۇرۋ دەڭگەيىن ارتتىرۋ ماسەلەلەرىمەن اينالىستىق. شاعىن جانە ورتا بيزنەسكە قولايلى جاعدايلار جاسالىپ جاتىر جانە بۇل جۇمىس جالعاسادى. اۋىل شارۋاشىلىعىنىڭ الەۋەتىن كۇشەيتۋ ءۇشىن جۇيەلى شارالار قابىلدانىپ جاتىر.

ءبىز ءۇشىن نەگىزگى باسىم باعىت - حالىقتىڭ ءال-اۋقاتىن ارتتىرۋ. بۇل باسىمدىق ەشقاشان وزگەرمەيدى. مەنىڭ تاپسىرمام بويىنشا دارىگەرلەر مەن پەداگوگتەردىڭ، بيۋجەتتىك سالا قىزمەتكەرلەرىنىڭ جالاقىسى ۇلعايتىلدى. زەينەتاقىلاردىڭ، ستيپەنديالار مەن جاردەماقىلاردىڭ تۇراقتى ءوسۋى قامتاماسىز ەتىلدى. زەينەتاقى جيناقتارىنىڭ ءبىر بولىگىن مەرزىمىنەن بۇرىن الۋ ەسەبىنەن ءبىر جارىم ميلليوننان استام وتانداسىمىز تۇرعىن ءۇي جاعدايىن جاقسارتىپ، ەمدەلە الدى»، - دەدى پرەزيدەنت.

مەملەكەت باسشىسى قاڭتار ايىندا مۇقتاج جاندارعا ناقتى كومەك كورسەتۋمەن اينالىساتىن «قازاقستان حالقىنا» قورى قۇرىلعانىن ەسكە سالدى.

«كونستيتۋتسياعا جەر مەن ونىڭ قويناۋى حالىققا تيەسىلى دەگەن نورما ەنگىزىلدى. بۇل ادەمى ۇران عانا ەمەس. «ۇلتتىق قور - بالالارعا!» باعدارلاماسى اتا زاڭعا ەنگىزىلگەن تۇزەتۋدىڭ ىسكە اسا باستاعانىن كورسەتىپ تۇر. بۇرىن-سوڭدى بولماعان بۇل شارا ۇلتتىق بايلىقتى ءادىل بولۋگە باعىتتالعان»، - دەدى قاسىم-جومارت توقايەۆ.


جاڭالىقتار