قوعامدا ءبىلىم ۇستەمدىگىن قالىپتاستىراتىن كەز كەلدى - پرەزيدەنت

استانا. قازاقپارات - ءبىلىم بەرۋ جانە عىلىم سالاسى ءاردايىم مەملەكەتتىڭ نازارىندا بولادى.

بۇل تۋرالى ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«مەن قوعامدا زاڭدىلىق پەن ءتارتىپتىڭ قاتاڭ ساقتالۋىنا باسا ءمان بەرەمىن. مۇنى ۇنەمى ايتىپ ءجۇرمىن. وسى رەتتە، تۇرمىستىق زورلىق-زومبىلىق، ادام جانە ەسىرتكى ساۋداسى ءۇشىن جازا كۇشەيتىلدى. براكونەرلىككە قارسى زاڭداردى قاتايتتىق. تابيعاتتى قورعاۋ جۇمىسىن مەملەكەتتىك دەڭگەيگە كوتەردىك. «جۇرتقا جاقىن پوليتسيا» قاعيداتى بويىنشا ءتارتىپ ساقشىلارىنىڭ قىزمەتىن رەفورمالاۋ باستالدى»، - دەدى مەملەكەت باسشىسى پرەزيدەنتتىككە قاسىم-جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيانىڭ فورۋمىندا.

پرەزيدەنت ءبىلىم، عىلىم سالاسىن دامىتۋعا ايرىقشا نازار اۋدارىلاتىندىعىن باسا ايتتى.

«قالا جانە اۋىل مەكتەپتەرى اراسىنداعى ايىرماشىلىقتى جويۋ ءۇشىن ناقتى شارالار قولعا الىندى. ءبىلىم ساپاسى تومەن جوعارى وقۋ ورىندارى جابىلا باستادى. دارىندى جاستاردى قولداۋ ءۇشىن «تاۋەلسىزدىك ۇرپاقتارى» اتتى گرانت بەرىلە باستادى. جاس عالىمدارعا الەمنىڭ بەدەلدى عىلىمي ورتالىقتارىندا وزىق ءبىلىم الۋ ءۇشىن 500 جانە «جاس عالىم» جوباسى اياسىندا 1000 گرانت ءبولىندى. جالپى، ءبىلىم بەرۋ جانە عىلىم سالاسى ءاردايىم مەملەكەتتىڭ نازارىندا بولادى. مەن بۇل سالالارعا ەرەكشە ءمان بەرەمىن. قوعامدا ءبىلىم ۇستەمدىگىن قالىپتاستىراتىن كەز كەلدى»، - دەدى قاسىم-جومارت توقايەۆ.