6 قازان, 17:00

پرەزيدەنت: باعىندىراتىن بەلەستەرىمىز الدا

استانا. قازاقپارات - «قاسىرەتتى قاڭتار» كەزىندەگى زور سىناقتى تۇتاس ەل بولىپ ەڭسەردىك.

بۇل تۋرالى مەملەكەت باسشىسى قاسىم-جومارت توقايەۆ پرەزيدەنتتىككە كانديداتۋراسىن قولداۋ جونىندەگى حالىقتىق كواليتسيانىڭ فورۋمىندا ايتتى، دەپ حابارلايدى قازاقپارات ءتىلشىسى.

«مەن ەلىمىزدىڭ ساياسي، الەۋمەتتىك، قۇقىقتىق، جانە باسقا دا ماڭىزدى جۇيەلەرىن تۇبەگەيلى جاڭعىرتۋ ءۇشىن اۋقىمدى رەفورما جۇرگىزدىم. بۇل رەفورمالار حالىقتىڭ تۇرمىسىن تۇزەۋگە، ءار ادامنىڭ قۇقىعىن تولىق قورعاۋعا، دەموكراتيالىق ۇدەرىستەردى جەدەل جۇرگىزۋگە باعىتتالعان. ءبىر سوزبەن ايتقاندا، بارلىعى تەك حالىق ءۇشىن جاسالىپ جاتىر. سونداي-اق، مەملەكەتتىلىگىمىزدى نىعايتۋعا ارنالدى. جالپى، كوپ جۇمىس اتقارىلدى دەپ ايتۋعا بولادى. ءبىراق، بۇل - كۇردەلى جولدىڭ باسى عانا. سوندىقتان، ءبىز «حالىق ۇنىنە قۇلاق اساتىن مەملەكەت» تۇجىرىمداماسىن باسشىلىققا الىپ، ءادىل قوعام قۇرۋعا كىرىستىك. ساياسي رەفورمانىڭ ءتورت توپتاماسىن جۇزەگە اسىردىق»، - دەدى مەملەكەت باسشىسى.

پرەزيدەنت بيلىك پەن قوعامنىڭ ديالوگىن نىعايتۋ ءۇشىن اتا داستۇرىمەن ۇلتتىق قۇرىلتاي شاقىرىلعانىن، ونىڭ جۇمىسىنا ءتۇرلى سالا وكىلدەرى بەلسەنە قاتىسقانىن اتاپ ءوتتى.

«الەمدى جايلاعان كوروناۆيرۋس ىندەتىنە بىرگە قارسى تۇردىق. «قاسىرەتتى قاڭتار» كەزىندەگى زور سىناقتى تۇتاس ەل بولىپ ەڭسەردىك. بيىل كونستيتۋتسياعا وتە ماڭىزدى وزگەرىستەر ەنگىزدىك. ەلىمىز ءۇشىن جارقىن كەلەشەككە جول اشتىق. ياعني، قىسقا ۋاقىتتا وراسان زور جۇمىستى بىرگە اتقاردىق دەپ سەنىممەن ايتۋعا بولادى. ءبىراق، ءالى دە اۋقىمدى جۇمىس اتقارۋىمىز كەرەك، باعىندىراتىن بەلەستەرىمىز الدا. قانداي قيىن بولسا دا، ءبارىمىز بىرگە ونى مىندەتتى تۇردە ابىرويمەن اتقارامىز. ورتاق ماقساتقا جەتەمىز!» - دەدى قاسىم-جومارت توقايەۆ.

جاڭالىقتار