اشىق ازاماتتىق قوعامنىڭ ىرگەسىن قالادىق دەپ كۇمانسىز ايتۋعا بولادى - مەملەكەت باسشىسى
بۇل تۋرالى ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ماۋسىم ايىندا وتكەن رەفەرەندۋم مەملەكەتىمىزدىڭ باعدارى دۇرىس ەكەنىن كورسەتتى. ەندى وركەنيەتتى پرەزيدەنتتىك باسقارۋ جۇيەسىنە كوشەمىز. ساياسي رەفورمالار ارقىلى «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» قاعيداتىن ورنىقتىراتىن بولدىق. كەلەسى جىلدان باستاپ ءماجىلىس پەن ءماسليحاتتار ارالاس جۇيە بويىنشا سايلانادى. بيلىك تارماقتارى اراسىندا تەپە-تەڭدىك ورناتۋ ءۇشىن شارالار قابىلداندى. پرەزيدەنتتىڭ ءبىرقاتار وكىلەتتىگى پارلامەنتكە بەرىلدى. ءوڭىر باسشىلارى بالامالى جولمەن تاڭدالاتىن بولدى»، - دەدى مەملەكەت باسشىسى قاسىم-جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيانىڭ فورۋمىندا.
مەملەكەت باسشىسى اۋىل اكىمدەرىن تىكەلەي سايلاۋ ءتاسىلى قولدانىلا باستاعانىن اتاپ ءوتتى.
«ساياسي پارتيالارعا جاعداي جاساۋ ءۇشىن زاڭدارعا وزگەرىس ەنگىزىلدى. ايەلدەرگە جانە جاستارعا ساياسات سالاسىندا جەڭىلدىكتەر بەرىلدى. مۇمكىندىگى شەكتەۋلى جاندار دا تىس قالمادى. اشىق ازاماتتىق قوعامنىڭ ىرگەسىن قالادىق دەپ كۇمانسىز ايتۋعا بولادى. قازىرگى اقپارات، ينتەرنەت داۋىرىندە ساياسي دامۋدىڭ باسقا بالاما جولى جوق»، - دەدى پرەزيدەنت.