قازاق ەلى اۋقىمدى، ساياسي-الەۋمەتتىك وزگەرىستەر الدىندا تۇر - ەرلان قوشانوۆ
بۇل تۋرالى ق ر پارلامەنتى ءماجىلىسىنىڭ - AMANAT پارتياسىنىڭ ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.
«قازاق ەلى اۋقىمدى، ساياسي-الەۋمەتتىك وزگەرىستەر الدىندا تۇر. قوزعالىس وزگەرىستەرگە، ومىرشەڭ وزگەرىس كەڭ ورىسكە باستايدى. الەمدەگى جەتەكشى ەلدەردىڭ ءبارى كەشەندى رەفورمانى باستان كەشكەن. بيلىك پەن قوعام ۇيلەسىم تاۋىپ، حالقىنىڭ ىنتىماعى جاراسقان ەلدەر ۇتىلماي ۇلت بولىپ ۇيىسىپ وتىر. ال ءبىرىنىڭ قولى ءبىرىنىڭ جاعاسىندا كەتىپ، ءوزارا الاۋىز بولعان جۇرتتىڭ جۇقاناسى دا قالعان جوق. بۇل تاريحتىڭ اشى دا بولسا شىندىعى. مۇنى نەگە ايتىپ وتىرمىز؟ كۇرمەۋى قيىن كۇردەلى ساتكە قاراماستان مەملەكەت باسشىسىنىڭ قىسقا مەرزىمدە قولعا العان تۇبەگەيلى رەفورمالارى ءوز جەمىسىن بەرە باستادى. ەلدەگى ساياسي، مەملەكەتتىك باسقارۋ ۇلگىسى جاڭا ساپاعا كوتەرىلدى. ەڭ باستىسى بارلىق سالادا ادىلەتتىلىك، تەڭدىك پرينتسيپتەرى قالىپتاسىپ، الەۋەتتى ازاماتتىق قوعام ورنىعىپ كەلەدى. بۇل جاڭا ءداۋىردىڭ باستاۋى»، - دەدى ەرلان قوشانوۆ قاسىم-جومارت توقايەۆتىڭ كانديداتۋراسىن قولداۋ جونىندەگى حالىقتىق كواليتسيانىڭ فورۋمىندا.
ءماجىلىس ءتوراعاسى قوعامدا پىكىر ەركىندىگى، دەموكراتيا قاعيدالارى سالتانات قۇرىپ جاتقانىن اتاپ ءوتتى.
«اتقارىلىپ جاتقان جۇمىستاردىڭ نەگىزگى ماقساتى - ساياسي، ەكونوميكالىق، الەۋمەتتىك رەفورمالاردى تاباندى تۇردە جۇزەگە اسىرىپ، ادىلەتتى قازاقستان قۇرۋ. وسى ورايدا بيىلعى جىلدىڭ 20- قاراشاسىنداعى پرەزيدەنت سايلاۋى قازاقستاننىڭ ساياسي تاريحىنداعى اسا ماڭىزدى وقيعا. مەملەكەت باسشىسى قاسىم-جومارت توقايەۆ كەزەكتەن تىس پرەزيدەنت سايلاۋىنىڭ، پارلامەنت ءماجىلىسى مەن ءماسليحاتتار سايلاۋىنىڭ كەستەسىن الدىن الا جاريالادى. بۇل - ەل تاريحىندا بۇرىن-سوڭدى بولماعان دەموكراتيالىق قادام، جاڭا ساياسي مادەنيەتتىڭ نىشانى. سايلاۋ جالپى حالىقتىڭ رەفەرەندۋمداعى تاڭداۋ مەن جاڭا كونستيتۋتسيالىق وزگەرىستەر نەگىزىندە وتكىزىلمەك. الداعى سايلاۋلار ەل ىشىندەگى ساياسي كۇشتەردىڭ، حالىقارالىق قاۋىمداستىقتىڭ ايرىقشا قىزىعۋشىلىعىن تۋدىرىپ وتىر. پرەزيدەنت سايلاۋىنىڭ ءدۇبىرى ەستىلگەلى بەرى ەلدەگى ءىرى ساياسي پارتيالار، قوعامدىق ۇيىمدار وزدەرىنىڭ جيىندارىن شاقىرىپ، سايلاۋعا قاتىستى ءىس-قيمىلدارىن باستاپ كەتتى»، - دەدى ول.