پرەزيدەنت سايلاۋى: توقايەۆتى قولداۋ جونىندەگى حالىقتىق كواليتسيا قۇرىلادى
6 قازان, 14:47

پرەزيدەنت سايلاۋى: توقايەۆتى قولداۋ جونىندەگى حالىقتىق كواليتسيا قۇرىلادى

استانا. قازاقپارات - قاسىم-جومارت توقايەۆتى قولداۋ جونىندەگى حالىقتىق كواليتسيا قۇرىلادى.

بۇل تۋرالى AMANAT پارتياسىنىڭ ءتوراعاسى – ق ر پارلامەنتى ءماجىلىسىنىڭ سپيكەرى ەرلان قوشانوۆ ايتتى، دەپ حابارلايدى قازاقپارات ءتىلشىسى.

«وزدەرىڭىزگە بەلگىلى، بىزدەن باسقا دا ءبىرقاتار پارتيالار مەن ساياسي بىرلەستىكتەر پرەزيدەنتتىككە مەملەكەت باسشىسى قاسىم-جومارت كەمەل ۇلى توقايەۆتىڭ كانديداتۋراسىن ۇسىنىپ وتىر. وسى ورايدا ءبىز سول ساياسي ۇيىمدارمەن بىرلەسىپ، قاسىم-جومارت كەمەل ۇلى توقايەۆتى قولداۋ جونىندەگى حالىقتىق كواليتسيا قۇرۋ جونىندە كەلىسىمگە كەلدىك»، - دەدى ول AMANAT پارتياسىنىڭ كەزەكتەن تىس XXIV سەزىندە.

ەرلان قوشانوۆ بۇگىن پرەزيدەنت ق. توقايەۆتىڭ قاتىسۋىمەن فورۋم وتەتىنىن ايتتى.

«تۇستەن كەيىن وسى عيماراتتا مەملەكەت باسشىسىنىڭ قاتىسۋىمەن ۇلكەن فورۋم وتەدى. سوعان ءبارىمىز قاتىسامىز. بارشاڭىزدى ادىلەتتى قازاقستان قۇرۋ جولىنداعى يگى باستامالاردى ىسكە اسىرۋ ءۇشىن جۇدىرىقتاي جۇمىلۋعا شاقىرامىن»، - دەدى پارتيا ءتوراعاسى.

ەسكە سالايىق، بۇگىن AMANAT پارتياسى قاسىم-جومارت توقايەۆتى پرەزيدەنتتىككە كانديدات رەتىندە ۇسىنۋ شەشىمىن قابىلداعان بولاتىن. سونداي-اق بۇگىن «قازاقستان حالىق پارتياسىنىڭ» كەزەكتەن تىس سەزى ءوتىپ، دەلەگاتتار الداعى سايلاۋعا قاسىم-جومارت توقايەۆتىڭ كانديداتۋراسىن قولدادى.

بۇعان دەيىن ق. توقايەۆتىڭ كانديداتۋراسىن پرەزيدەنتتىككە ءماسليحاتتار دەپۋتاتتارىنان قۇرالعان رەسپۋبليكالىق قوعامدىق بىرلەستىگى، «قازاقستان سپورتشىلار وداعى» رەسپۋبليكالىق قوعامدىق بىرلەستىگى، قازاقستاننىڭ ازاماتتىق اليانسى، «ارداگەرلەر ۇيىمى» رەسپۋبليكالىق قوعامدىق بىرلەستىگى، «Qazaqstan Team» قوعامدىق بىرلەستىگى، ۇلتتىق ۆولونتەرلىك جەلىسى ۇسىنعان ەدى.


جاڭالىقتار