داۋلەت تۇرلىحانوۆ قاسىم- جومارت توقايەۆتىڭ كانديداتۋراسىن قولداۋعا شاقىردى
6 قازان, 12:03

داۋلەت تۇرلىحانوۆ قاسىم- جومارت توقايەۆتىڭ كانديداتۋراسىن قولداۋعا شاقىردى

استانا. قازاقپارات - قازاقستاننىڭ ەڭبەك سىڭىرگەن قايراتكەرى، وليمپيادا ويىندارىنىڭ كۇمىس، قولا جۇلدەگەرى داۋلەت تۇرلىحانوۆ AMANAT پارتياسىنداعى جاقتاستارىنان قاسىم- جومارت توقايەۆتى پرەزيدەنتتىككە كانديدات رەتىندە قولداۋعا شاقىردى، دەپ حابارلايدى قازاقپارات ءتىلشىسى.

«ادىلەتتى قوعام قۇرۋ، «حالىق ۇنىنە قۇلاق اساتىن مەملەكەت» قالىپتاستىرۋ جولىندا ەلىمىزدە قىزۋ جۇمىستار اتقارىلۋدا. تالاي جىل جاۋىر بولعان كوپ ماسەلە رەتكە كەلە باستادى. پرەزيدەنتىمىزدىڭ باستاماسىمەن ەل مۇددەسىنە ساي جۇيەلى رەفورمالار قولعا الىندى. سپورت سالاسىنىڭ دامۋىنا ەرەكشە كوڭىل ءبولىنىپ، جاقسى قولداۋ كورسەتىلىپ جاتىر»، - دەدى ول ەلوردادا ءوتىپ جاتقان AMANAT پارتياسىنىڭ كەزەكتەن تىس XXIV سەزىندە.

داڭقتى پالۋان ەلىمىزدىڭ بارلىق وڭىرىندە امبەباپ سپورت كەشەندەرى سالىنعانىن، اۋلالار مەن قوعامدىق ورىنداردا جاتتىعۋ جابدىقتارى مەن قۇرىلعىلار قويىلعانىن اتاپ ءوتتى.

«وسى مۇمكىندىكتەردى ورىندى پايدالانىپ، ۇرپاعىمىزدى دەنى ساۋ، مىقتى قىلىپ ءوسىرۋىمىز كەرەك. بارىمىزگە ورتاق جالعىز عانا وتانىمىز، مەملەكەتىمىز بار. ءبىزدى ورتاق ماقساتتار مەن قۇندىلىقتار بىرىكتىرەدى. ەلىمىزدى قيىن كەزەڭدە تاستاماي، بىرىكتىرىپ الىپ شىققان قاجىرلى ەڭبەگىن باعالاپ، بولاشاققا باعىتتالعان تىڭ باستامالارى مەن حالىقتىڭ مۇددەسىنە ارنالعان جوسپارىنا سەنىم ارتىپ، قاسىم- جومارت كەمەل ۇلى توقايەۆتى ءبىر كىسىدەي قولداۋعا بارشاڭىزدى شاقىرامىن!»، - دەدى داۋلەت تۇرلىحانوۆ.

اۆتور

مارلان جيەمباي


جاڭالىقتار