ادىلەتتى قازاقستاندا ەڭبەك ادامى ەڭ ءبىرىنشى ورىندا تۇرادى - مەملەكەت باسشىسى

استانا. قازاقپارات - ادىلەتتى قازاقستاندا ەڭبەك ادامى ەڭ ءبىرىنشى ورىندا تۇرادى. سەبەبى، وتانشىلدىق، ەڭ الدىمەن تۋعان ەلىڭىڭ يگىلىگى ءۇشىن قىزمەت ەتۋ دەگەن ءسوز.

پاۆلودار وبلىسىنا جۇمىس ساپارى اياسىندا 85 جىل بۇرىن ىرگەسى قالانعان اباي اتىنداعى دارىندى بالالارعا ارنالعان گيمنازياعا بارعان پرەزيدەنت وسىلاي وي ءبولىستى، دەپ حابارلايدى قازاقپارات اقورداعا سىلتەمە جاساپ.

«مۇعالىم بولۋ - ەڭ ابىرويلى ەڭبەك. سونىمەن بىرگە، بۇل - وتە جاۋاپتى جۇمىس. ۇستازدىق - قاسيەتتى قىزمەت دەسەك تە ارتىق ەمەس. سەبەبى، ءار شاكىرتتىڭ تۇلعا بولىپ قالىپتاسۋىندا ۇستازدىڭ ورنى ەرەكشە.

جاستارىمىزدىڭ وتانشىل، ءادىل، ادال جانە ەڭبەكقور بولىپ وسۋىنە ۇستازدىڭ قوساتىن ۇلەسى وراسان زور. ءبىز جاستاردىڭ ەڭبەككە قۇلشىنىسىن ارتتىرۋىمىز قاجەت. ادىلەتتى قازاقستاندا ەڭبەك ادامى ەڭ ءبىرىنشى ورىندا تۇرادى. سەبەبى، وتانشىلدىق، ەڭ الدىمەن تۋعان ەلىڭىڭ يگىلىگى ءۇشىن قىزمەت ەتۋ دەگەن ءسوز. ول ءۇشىن، ارينە ەڭبەكقور، ىسكەر بولۋ كەرەك. اركىم ءوز بولاشاعىنا ءوزى جاۋاپتى ەكەنىن جاستار بالا كەزدەن تەرەڭ ۇعىنىپ وسۋگە ءتيىس. بۇل يدەيالاردىڭ ءبارىن بالالاردىڭ ساناسىنا مىندەتتى تۇردە ءسىڭىرۋ كەرەك. ۇلى اباي ايتقان «تولىق ادام» ۇعىمى - بولمىسى كەمەل، كوزقاراسى تەرەڭ، كوكىرەگى وياۋ، ەڭبەكقور ادام دەگەندى بىلدىرەدى. حالقىمىز «ۇستازى جاقسىنىڭ - ۇستامى جاقسى» بەكەر ايتپاعان»، - دەدى قاسىم-جومارت توقايەۆ.

مەملەكەت باسشىسى پاۆلودار وبلىسى ۇلتتىڭ قايتا ورلەۋ ورتالىقتارىنىڭ ءبىرى ەكەنىن اتاپ ءوتتى. ونىڭ ايتۋىنشا، قازاقستاندىق كوپتەگەن تانىمال عالىم وسى وڭىردە وسكەن جانە قازىرگى پەداگوگتەر اعا بۋىننىڭ ءىزىن جالعاپ كەلەدى.

مەكتەپ ديرەكتورى سالتانات شاباجانوۆا قاسىم-جومارت توقايەۆقا وقۋ ورنىنىڭ تەرەڭ تاريحى تۋرالى اقپارات بەرىپ، گيمنازيانىڭ جاڭارتىلعان كابينەتتەرىن كورسەتتى.

وقۋشىلار مەكتەپ كىتاپحاناسىندا مەملەكەت باسشىسىنا رامازان توقتاروۆتىڭ شىعارماشىلىعى بويىنشا «وقۋعا قۇشتار مەكتەپ» جوباسىن تانىستىرىپ، جازۋشىنىڭ «ەرتىس مۇحيتقا قۇيادى» اتتى كىتابىن سىيعا تارتتى.

سودان كەيىن پرەزيدەنت رەسپۋبليكالىق جانە حالىقارالىق ءپان وليپيادالارىنىڭ جەڭىمپازدارى مەن جۇلدەگەرلەرىن دايىنداعان پاۆلودار وبلىسىنىڭ پەداگوگتەرىمەن اڭگىمەلەستى. قاسىم-جومارت توقايەۆ ولاردى دۇنيەجۇزىلىك ۇستاز كۇنىمەن جانە قازاقستاندىق پەداگوگتەردىڭ وتكەن كاسىبي مەرەكەسىمەن، ال گيمنازيا ۇجىمىن مەرەيتويىمەن قۇتتىقتادى.

مەملەكەت باسشىسى چەرچيللدىڭ «مۇعالىمدەردە مەملەكەت باسشىلارى ارماندايتىن بيلىك بار» دەگەن ءسوزىن تىلگە تيەك ەتىپ، مەكتەپتەردە جەكە ادامنىڭ دا، تۇتاس مەملەكەتتەردىڭ دە شىنايى باسەكەلەستىك نەگىزى قالاناتىنىن اتاپ ءوتتى.

قاسىم-جومارت توقايەۆ قوعامدىق جانە جەكە قۇندىلىقتار جۇيەسىن قايتا جاڭعىرتۋ كەرەك ەكەنىن ايتتى. پرەزيدەنتتىڭ ايتۋىنشا، ءبىز ۇلتتىق داستۇرلەرىمىزدى ساقتاي وتىرىپ، قوعامدا پروگرەسسيۆتى ۇعىمداردى بەلسەندى دارىپتەۋىمىز قاجەت. بۇل - ەڭبەكقورلىق، ءبىلىم كۋلتى، ءوزارا سىيلاستىق، ىنتىماقتاستىق، سەنىم، ىسكەرلىك، ۇقىپتىلىق، سىني ويلاۋ سىندى قاسيەتتەر.

پرەزيدەنت ۇلتتىڭ جاڭا قارىم-قابىلەتتەرىن قالىپتاستىرۋدا جانە ادىلەتتى قازاقستاندى قۇرۋدا مۇعالىمدەر شەشۋشى ءرول اتقاراتىنىنا سەنىم ءبىلدىردى.

پاۆلودار وبلىسىنىڭ پەداگوگتەر قاۋىمىنىڭ اتىنان 8№ ورتا مەكتەپ-ليتسەيىنىڭ ورىس ءتىلى مەن ادەبيەتى ءپانىنىڭ مۇعالىمى يرينا شيەۆچەنكو جانە مۇزافار الىمبايەۆ اتىنداعى ورتا مەكتەپتىڭ مۋزىكا ءپانىنىڭ مۇعالىمى باقىتحان ورازبەك ءسوز سويلەدى.