پرەزيدەنت: پاۆلودار بۇكىل ءوڭىردىڭ دامۋ ورتالىعىنا اينالۋى كەرەك

استانا. قازاقپارات - پاۆلوداردى بۇكىل ءوڭىردىڭ دامۋ ورتالىعىنا اينالدىرۋ - اكىمدىك پەن ۇكىمەت الدىنداعى وتە ماڭىزدى مىندەت.

بۇل تۋرالى مەملەكەت باسشىسى قاسىم-جومارت توقايەۆ پاۆلودار جۇرتشىلىعىمەن كەزدەسۋىندە ايتتى، دەپ حابارلايدى قازاقپارات اقورداعا سىلتەمە جاساپ.

«پاۆلودار بۇكىل ءوڭىردىڭ دامۋ ورتالىعىنا، وبلىس حالقىنىڭ تۇراقتى ءال-اۋقاتىن جانە تۇرمىس ساپاسىن جاقسارتۋدىڭ قوزعاۋشى كۇشىنە اينالۋى كەرەك. مەنىڭ ويىمشا، بۇل - اكىمدىك پەن ۇكىمەت الدىندا تۇرعان وتە ماڭىزدى مىندەت. وسى جەردە پرەمەر-ءمينيستردىڭ ءبىرىنشى ورىنباسارى رومان ۆاسيليەۆيچ سكليار وتىر. ول - سىزدەردىڭ جەرلەستەرىڭىز. وعان بارلىق مۇمكىندىك بەرىلەدى. پاۆلودار قالاسىنىڭ جانە بۇكىل وبلىستىڭ دامۋىنا اتسالىسىڭىز»، - دەدى پرەزيدەنت.