بەيبىتشىلىك پەن كەلىسىمدى قورعاي وتىرىپ، ەگەمەندىك باعىتىمىزدى ۇستانۋىمىز كەرەك - پرەزيدەنت
بۇل تۋرالى مەملەكەت باسشىسى قاسىم-جومارت توقايەۆ پاۆلودار وبلىسى جۇرتشىلىعىمەن كەزدەسۋىندە ايتتى، دەپ حابارلايدى قازاقپارات ءتىلشىسى.
«ۇلى دالا تورىندە قوناقجايلىقپەن جانە ءوزارا قولداۋ كۋلتىمەن ۇيلەسەتىن ەركىندىك پەن شىعارماشىلىق رۋحى ءاردايىم باعالانىپ كەلگەن. قازاقستان ءتۇرلى وركەنيەتتەر توعىسىپ، بايي تۇسەتىن ورىنعا اينالدى. سوندىقتان، «ءارالۋاندىق بىرلىگى» قاعيداتى ەلىمىزدىڭ قوعامدىق دامۋىنا نەگىز بولىپ وتىر. جاقىندا ريم پاپاسى قازاقستان تۋرالى، ءوزارا تولەرانتتىق، دوستىق جانە ەلىمىزدىڭ بەيبىتشىلىك پەن ىنتىماقتاستىققا ۇمتىلىسى تۋرالى وتە جىلى لەبىزىن ايتتى»، - دەدى پرەزيدەنت.
ءوز سوزىندە مەملەكەت باسشىسى ارى قاراي دەموكراتيالاندىرۋ ءۇشىن پرەزيدەنتتىك ينستيتۋتتى رەفورمالاۋعا باستاماشى بولعانىن ەسكە سالدى. وندا مەملەكەت باسشىسىنىڭ وكىلەتتىگى ءبىر رەت سايلانۋ قۇقىعىمەن جەتى جىلدىق مەرزىمگە شەكتەلگەن. بۇل كونستيتۋتسيالىق نورمانى قابىلداۋ ازاماتتار اراسىندا زور قولداۋعا يە بولدى.
«بۇرىن-سوڭدى بولماعان گەوساياسي شيەلەنىس پەن جاھاندىق ەكونوميكاداعى داعدارىس قۇبىلىستارىنىڭ ءوسۋى كەزىندە ەلىمىز ءوزىنىڭ جوعارى دامۋ ديناميكاسىن ساقتاۋى كەرەك. ءبىزدىڭ تابىسىمىزدىڭ كەپىلى - جالپىۇلتتىق بىرلىك پەن جالپى ازاماتتىق ىنتىماقتاستىق. ءبىز ءوزىمىزدىڭ باستى بايلىعىمىز - بەيبىتشىلىك پەن كەلىسىمدى قورعاي وتىرىپ، ەگەمەندىك باعىتىمىزدى ناقتى ۇستانۋىمىز كەرەك»، - دەدى ق. توقايەۆ.