19:30, 05 - قازان 2022 | GMT +6
قاسىم-جومارت توقايەۆ پرەزيدەنت سايلاۋى ناۋقانىنا قاتىستى پىكىر ءبىلدىردى
پاۆلودار. قازاقپارات - مەملەكەت باسشىسى قاسىم-جومارت توقايەۆ بۇگىن پاۆلودار وبلىسىنىڭ جۇرتشىلىعىمەن كەزدەسۋى بارىسىندا پرەزيدەنت سايلاۋى ناۋقانىنا قاتىستى پىكىر ءبىلدىردى، دەپ حابارلايدى قازاقپارات بورت1№ Telegram كانالىنا سىلتەمە جاساپ.
«پرەزيدەنت سايلاۋى جاريالانعاننان كەيىن دايىندىققا جەتكىلىكتى ۋاقىت ءوتتى. بۇگىندە سايلاۋ ناۋقانى قارقىن العانىن كورىپ وتىرمىز. ۇمىتكەرلەر ۇسىنىلىپ، پارتيالار مەن قوعامدىق قوزعالىستار بەلسەندىلىك تانىتىپ جاتىر. ىشكى ساياسي ءومىردىڭ جاندانعانى كورىنىپ تۇر.
ءبىز بارلىق نەگىزگى ساياسي ينستيتۋتتاردى جاڭعىرتاتىن جاڭا ەلەكتورالدى كەزەڭگە قادام باستىق. وزدەرىڭىزگە ءمالىم، مەن ەلىمىزدەگى ەڭ ءىرى AMANAT پارتياسىنىڭ ءتوراعاسى قىزمەتىنەن باس تارتتىم. كونستيتۋتسيالىق رەفورما ناتيجەسىندە پرەزيدەنتكە ءوز وكىلەتتىگىن اتقارۋ كەزىندە پارتيا قاتارىندا بولۋعا تىيىم سالىندى»، - دەدى مەملەكەت باسشىسى.