ۇكىمەتكە كەلەسى جىلى پاۆلوداردا جاڭا كوپىر سالۋ تاپسىرىلدى

استانا. قازاقپارات - پاۆلودارداعى ەرتىستەن وتەتىن ەسكى كوپىر كولىك-لوگيستيكا سالاسىن دامىتۋعا مۇمكىندىك بەرمەي وتىر.

مەملەكەت باسشىسى قاسىم-جومارت توقايەۆ ۇكىمەتكە كەلەسى جىلى جاڭا كوپىر قۇرىلىسىن باستاۋدى تاپسىردى، دەپ حابارلايدى قازاقپارات اقورداعا سىلتەمە جاساپ.

«پاۆلوداردىڭ وراسان زور ترانزيتتىك الەۋەتى بار. ءبىراق، ەرتىستەن وتەتىن ەسكى كوپىر كولىك-لوگيستيكا سالاسىن دامىتۋعا مۇمكىندىك بەرمەي وتىر. ونىڭ اپاتتى جاعدايدا تۇرعانىنا ءبىراز جىل بولدى. كوپىر ارقىلى جۇك كولىكتەرىنىڭ جۇرۋىنە تىيىم سالىنعان. بۇعان دەيىن وبلىس ورتالىعىن اينالىپ وتۋگە جول اشاتىن جاڭا كوپىر سالۋ جوسپارلانعان. ۇكىمەتكە كەلەسى جىلى وسى جوبانى باستاۋدى تاپسىرامىن. جولدى كۇتىپ ۇستاۋعا باسا نازار اۋدارۋ قاجەت»، - دەدى پرەزيدەنت.