پرەزيدەنت پاۆلودار وبلىسىنىڭ سۋارمالى القاپتارىنا بولىنەتىن قارجىنى كوبەيتۋدى تاپسىردى

پاۆلودار. قازاقپارات - پرەزيدەنت پاۆلودار وبلىسىنىڭ سۋارمالى القاپتارىنا بولىنەتىن قارجىنى كوبەيتۋدى تاپسىردى.

بۇل تۋرالى مەملەكەت باسشىسى وبلىس تۇرعىندارىمەن كەزدەسۋى بارىسىندا ءمالىم ەتتى، دەپ حابارلايدى قازاقپارات بورت 1№ Telegram كانالىنا سىلتەمە جاساپ.

«پاۆلودار ءوڭىرى ءۇشىن ەرتىستىڭ وراسان زور ماڭىزى بار. بۇل وزەن - وسى ولكەنىڭ تۇرعىندارى، كاسىپورىندارى جانە اۋىل شارۋاشىلىعى ءۇشىن نەگىزگى تىرشىلىك كوزى. سوڭعى ءۇش جىلدا وبلىستا سۋارمالى جەردىڭ كولەمى 1,5 ەسە ارتتى. الداعى ۋاقىتتا ونى تاعى 2 ەسەگە، ياعني، 300 مىڭ گەكتارعا دەيىن ۇلعايتۋ قاجەت. وبلىس اكىمدىگى وسى ماسەلەگە باسا نازار اۋدارۋعا ءتيىس.

ۇكىمەتكە ءوڭىردىڭ سۋارمالى القاپتارىنا بولىنەتىن قارجىنى كوبەيتۋدى تاپسىرامىن. بۇل ازىق-تۇلىك قاۋىپسىزدىگى تۇرعىسىنان عانا ەمەس، حالىقتى جۇمىسپەن قامتۋ ءۇشىن دە وتە ماڭىزدى. سۋدىڭ تاپشىلىعى ەكونوميكانى دامىتۋعا كەدەرگى كەلتىرەدى. سوندىقتان، ەرتىستىڭ سۋىن ءتيىمدى، ۇنەمدى پايدالانۋعا ايرىقشا ءمان بەرىلۋى كەرەك»، - دەدى قاسىم-جومارت توقايەۆ.