توقايەۆ: پاۆلودار ءوڭىرى - ەكونوميكامىزدىڭ ەنەرگەتيكالىق جۇرەگى

پاۆلودار. قازاقپارات - پاۆلودار وبلىسىندا «قۋاتتى وڭىرلەر - قۋاتتى ەل» قاعيداتى ايقىن كورىنىس تاپقان. بۇل ايماقتى ەكونوميكامىزدىڭ ەنەرگەتيكالىق جۇرەگى دەۋگە بولادى.

بۇگىن پاۆلودار وبلىسىنا جۇمىس ساپارى بارىسىندا وبلىس جۇرتشىلىعىمەن كەزدەسكەن مەملەكەت باسشىسى قاسىم-جومارت توقايەۆ وسىلاي دەدى، دەپ حابارلايدى قازاقپارات بورت 1№ Telegram كانالىنا سىلتەمە جاساپ.

«ابىلايدىڭ اقىلشىسى بۇحار جىراۋ، عۇلاما ويشىل ءماشھۇر ءجۇسىپ، الاش ارداقتىسى جۇسىپبەك ايماۋىتوۆ وسىندا دۇنيەگە كەلگەن. جاياۋ مۇسا، ەستاي اقىن، سۇلتانماحمۇت تورايعىروۆ، شاكەن ايمانوۆ سىندى رۋحانيات سالاسىنىڭ ايتۋلى وكىلدەرى وسى وڭىردەن شىققان. قانىش ساتبايەۆ، الكەي مارعۇلان، ەرمۇحان بەكماحانوۆ، كەمەل اقىشيەۆ، شاپىق شوكين سياقتى ايگىلى عالىمدار - ەرتىس بويىنىڭ پەرزەنتتەرى. ءبىر سوزبەن ايتساق، باياناۋىل باۋرايى - تەكتىلەردىڭ بەرەكەلى بەسىگى.

ەلىمىزدەگى ەلەكتر قۋاتىنىڭ 40 پايىزدان استامى وسىندا وندىرىلەدى. قازاقستاندا شىعارىلاتىن كومىردىڭ دە جارتىسىنان استامى پاۆلوداردىڭ ەنشىسىندە. وبلىستىڭ ءاربىر بەسىنشى تۇرعىنى وڭدەۋ ونەركاسىبىندە نەمەسە وتىن-ەنەرگەتيكا كەشەنىندە جۇمىس ىستەيدى»، - دەدى پرەزيدەنت.

سونداي-اق مەملەكەت باسشىسى ەلىمىزدەگى مۇناي-حيميا ونىمدەرىنىڭ ۇشتەن ءبىرى، فەرروقورىتپالاردىڭ جارتىسىنان كوبى وسى وڭىردە شىعاتىنىن جانە بۇل ولكە وڭدەۋ ونەركاسىبىنىڭ جانە شيكىزاتتىق ەمەس ەكسپورتتىڭ كولەمى بويىنشا الدىڭعى ورىندا تۇرعانىن جەتكىزدى.