پرەزيدەنت سايلاۋى: ءماسليحات دەپۋتاتتارىنىڭ بىرلەستىگى قاسىم- جومارت توقايەۆتىڭ كانديداتۋراسىن ۇسىندى

استانا. قازاقپارات - ەلىمىز بويىنشا ءماسليحاتتار دەپۋتاتتارىنان قۇرالعان رەسپۋبليكالىق قوعامدىق بىرلەستىك ق ر پرەزيدەنتى سايلاۋىنا ءوز كانديداتۋراسىن ۇسىندى، دەپ حابارلايدى قازاقپارات ءتىلشىسى.

بۇگىن استانادا قازاقستان ءماسليحاتتارىنىڭ دەپۋتاتتارى بىرلەستىگىنىڭ وتىرىسى ءوتتى.

اتالعان جيىنعا ەلىمىزدىڭ بارلىق وڭىرىنەن ءماسليحات دەپۋتاتتارى مەن وكىلدەرى قاتىستى.

بىرلەستىك مۇشەلەرى 20-قاراشادا وتەتىن ق ر پرەزيدەنتى سايلاۋىنا كانديدات رەتىندە مەملەكەت باسشىسى قاسىم- جومارت توقايەۆتى ۇسىندى.

«قاراشا ايىندا ەلىمىز ءۇشىن ماڭىزدى ناۋقان، پرەزيدەنت سايلاۋى وتەدى. قازىر كانديداتتاردى ۇسىنۋ، تىركەۋ پروتسەسى ءجۇرىپ جاتىر. قازاقستاننىڭ الداعى 7 جىل ىشىندە دامۋى سول سايلاۋدان كەيىن ايقىندالادى. ءبىزدىڭ بىرلەستىك اقىلداسا كەلە، ءبىراۋىزدان 20-قاراشادا وتەتىن ق ر پرەزيدەنتى سايلاۋىنا كانديدات رەتىندە قازاقستان رەسپۋبليكاسىنىڭ قازىرگى پرەزيدەنتى قاسىم- جومارت توقايەۆتى ۇسىنامىز. قازىر الەمدەگى گەوساياسي احۋالدى بارشاڭىز ءبىلىپ وتىرسىزدار. وسى ورايدا ءبىز ەل بىرلىگىن ساقتاپ، مەملەكەت باسشىسى جۇرگىزىپ كەلگەن ساياساتتى قولداپ، جاڭا قازاقستاندى بىرگە قۇرۋىمىز قاجەت»، - دەدى شىمكەنت قالاسى ءماسليحاتىنىڭ حاتشىسى ءباھادۇر نارىمبەتوۆ.

ونىڭ ايتۋىنشا، اۋمالى- توكپەلى زاماندا مەملەكەت باسشىسىنىڭ ەل تۇتاستىعى مەن تاۋەلسىزدىگىن ساقتاۋ قالۋدا تاجىريبەسى مول.

«ءبىزدىڭ بىرلەستىك رەسپۋبليكا بويىنشا ءماسليحات دەپۋتاتتارىنان قۇرىلعان. حالىقپەن كەزدەسۋ كەزىندە دەپۋتاتتار الدىندا ءتۇرلى ماسەلەلەر كوتەرىلەدى. وسىعان وراي حالىقتىڭ قالاۋى دا قاسىم- جومارت توقايەۆقا ءتۇسىپ وتىر. حالىق پرەزيدەنت رەتىندە قاسىم- جومارت توقايەۆتى كورگىسى كەلەدى»، - دەيدى ول.

قاسىم- جومارت توقايەۆ قاراعاندى وڭىرىندەگى ءبىرقاتار اۆتوجول قۇرىلىسى بويىنشا تاپسىرما بەردى

قاراعاندى. قازاقپارات - پرەزيدەنت قاسىم- جومارت توقايەۆ قاراعاندى وبلىسىنداعى ماڭىزى بار ءبىرقاتار اۆتوجول قۇرىلىسى بويىنشا تاپسىرمالار بەردى، دەپ حابارلايدى قازاقپارات.

«قاراعاندى وبلىسى ەلىمىزدىڭ ءدال ورتاسىندا ورنالاسقان. وڭتۇستىك پەن سولتۇستىكتى جالعايتىن ەڭ باستى كۇرە جول وسى ءوڭىردى باسىپ وتەدى. ايماقتى دامىتۋعا اۆتوكولىك جولدارىنىڭ ساپاسى ايرىقشا ىقپال ەتەتىنى انىق.

قازىر ورتالىق - وڭتۇستىك كولىك ءدالىزى سالىنىپ جاتىر. بالقاش قالاسى ارقىلى وتەتىن جولدىڭ قۇرىلىسى وتە باياۋ ءجۇرىپ، مەرزىمى قايتا- قايتا كەيىنگە قالۋدا. ۇكىمەتكە «قاراعاندى - بالقاش» جانە «بالقاش - بۋرىلبايتال» تاسجولىن كەلەسى جىلى سالىپ ءبىتىرۋدى تاپسىرامىن.

سونىمەن بىرگە، «قاراعاندى - جەزقازعان» كۇرە جولى دا اسا ماڭىزدى. ۇزىندىعى 500 شاقىرىمنان اساتىن جول جوندەلسە، ورتالىق وڭىرلەرگە بارىس- كەلىس جاقسارادى. جۇك تاسىمالى كوبەيەدى. بۇل ۇلىتاۋ وبلىسىن دامىتۋعا زور سەپتىگىن تيگىزەدى. ەكى وبلىستىڭ ينۆەستيتسيالىق جانە تۋريستىك مۇمكىندىگىن ارتتىرادى. وسى جولدى جوندەۋ جۇمىسىنا الداعى جىلى دەرەۋ كىرىسۋ كەرەك.

سونداي- اق، «قاراعاندى - قارقارالى» تاسجولىن جوندەۋدى تاپسىرامىن. قارقارالىنىڭ تۋريستىك الەۋەتىن ارتتىرۋ ماقساتىندا بۇل جۇمىستى الداعى ەكى جىلدىڭ ىشىندە اياقتاۋ قاجەت»، - دەدى ق. توقايەۆ قاراعاندى وبلىسىنىڭ جۇرتشىلىعىمەن كەزدەسۋ بارىسىندا.