دەپۋتات كوممۋنالدىق قىزمەت جۇمىسشىلارىن مەملەكەتتىك باسپانا الاتىندار تىزىمىنە قوسۋدى ۇسىندى

استانا. قازاقپارات - ءماجىلىستىڭ جالپى وتىرىسىندا دەپۋتات باۋىرجان سارتبايەۆ كوممۋنالدىق قىزمەت جۇمىسشىلارىنا باسپانا ساتىپ الۋ ءۇشىن جەڭىلدەتىلگەن پايىزى تومەن نەسيە بەرۋ باعدارلاماسىن ىسكە قوسۋدى ۇسىندى، دەپ حابارلايدى قازاقپارات ءتىلشىسى.

«بىلتىر مەملەكەت باسشىسى قاسىم-جومارت توقايەۆ «حالىق بىرلىگى جانە جۇيەلى رەفورمالار-ەلدىڭ وركەندەۋىنىڭ بەرىك نەگىزى» اتتى قازاقستان حالقىنا جولداۋىندا ءبىرىڭعاي تۇرعىن ءۇي باعدارلاماسىن قۇرۋ مىندەتىن بەلگىلەدى. ەندىگى كەزەكتە، جاڭا تۇرعىن ءۇي باعدارلاماسى اياسىندا بۇرىن مەملەكەتتىك باعدارلامالارمەن قامتىلماعان الەۋمەتتىك توپتاردىڭ مۇددەسىن ەسكەرۋ قاجەت. بۇل ساناتقا شارۋاشىلىق جۇرگىزۋ قۇقىعىنداعى مەملەكەتتىك كوممۋنالدىق كاسىپورىنداردىڭ قىزمەتكەرلەرى جانە تاعى باسقالار جاتادى»، - دەدى ب. سارتبايەۆ پرەمەر-ءمينيستردىڭ ورىنباسارى رومان سكلياردىڭ اتىنا جولداعان ساۋالىندا.

ونىڭ پايىمىنشا، جۇمىسى ەلدى مەكەندەر ءارى تۇتاس وڭىرلەردىڭ قاۋىپسىزدىگى مەن تىنىس- تىرشىلىگىن قامتاماسىز ەتەتىن كوممۋنالدىق قىزمەتتەردىڭ جۇمىسشىلارى تۇرعىن ءۇي الۋ نەمەسە جەڭىلدەتىلگەن تالاپتارى بار باعدارلامالاردان تىس قالماۋى ءتيىس.

«2022-جىلدىڭ جازىندا «استانا سۋ ارناسى»، «قازسۋشار» كاسىپورىندارىندا سايلاۋشىلارمەن كەزدەسۋ كەزىندە جىلدار بويى ەڭبەك ەتىپ كەلە جاتقان قىزمەتكەرلەر تۋرالى ماسەلە قوزعالدى. ماسەلەن، قانىش ساتپايەۆ اتىنداعى سۋ ارناسىنىڭ قىزمەتكەرلەرى تۇرعىن ءۇي ساتىپ الۋ ءۇشىن مەملەكەتتىك باعدارلامالاردىڭ ەشقايسىنا قاتىسا المايدى. سونداي-اق توتەنشە جاعدايلار مينيسترلىگىنە جاتاتىن شارۋاشىلىق جۇرگىزۋ قۇقىعىنداعى «رەزەرۆ» مەملەكەتتىك كاسىپورىنى سياقتى ۇيىمدار دا وسىنداي ماسەلە بار. مۇندا دا قىزمەتكەرلەر كوممۋنالدىق نەمەسە مەملەكەتتىك تۇرعىن ءۇي الۋ ءۇشىن كەزەككە تۇرا المايدى، ال كوممەرتسيالىق تۇرعىن ءۇي ساتىپ الۋعا ولار ءۇشىن ارنايى جەڭىلدىكتەر جوق. بۇل مەكەمەلەردىڭ قىزمەتى مەملەكەتتىك دوتاتسيا ەسەبىنەن جۇزەگە اسىرىلادى، قىزمەتكەرلەردىڭ جالاقى دەڭگەيى كوممەرتسيالىق سەكتور ماماندارىمەن سالىستىرعاندا ءبىرشاما تومەن»، - دەدى دەپۋتات.

وسى ورايدا ول كوممۋنالدىق قىزمەت جۇمىسشىلارىن مەملەكەتتىك تۇرعىن ءۇي الۋعا ۇمىتكەر ادامدار تىزىمىنە قوسۋدى سۇرادى.

«جۇمىسى ەلدى مەكەندەر ءارى جالپى وڭىرلەردىڭ قاۋىپسىزدىگى مەن تىنىس-تىرشىلىگىنە تىكەلەي اسەر ەتەتىن كوممۋنالدىق قىزمەت ادامدارى ءۇشىن تۇرعىن ءۇي الۋ مۇمكىندىكتەرىن نەمەسە باسپانا ساتىپ الۋ ءۇشىن جەڭىلدەتىلگەن پايىزى تومەن نەسيە بەرۋ باعدارلاماسىن ىسكە قوسۋ ماڭىزدى. كوممۋنالدىق كاسىپورىنداردىڭ جاس ماماندارىن وتباسىلىق جاتاقحانالارمەن قامتاماسىز ەتۋ كەرەك»، - دەدى دەپۋتات.