مەملەكەت باسشىسى تۇرمىستىق تەحنيكا جانە كولىك دوڭگەلەگىن شىعاراتىن زاۋىتتارعا باردى
«KamaTyresKZ» دوڭگەلەك زاۋىتىن بيىل جىل سوڭىنا دەيىن ىسكە قوسۋ جوسپارلانعان. كاسىپورىن باستاپقى كەزدە جەڭىل جانە جەڭىل جۇك كولىكتەرىنە ارنالعان دوڭگەلەكتەر شىعارادى. كەيىن جوبانىڭ ەكىنشى كەزەڭىندە ترانسپورتەر، كونۆەيەر لەنتاسى سياقتى رەزيناتەحنيكالىق بۇيىمدار، ال ءۇشىنشى كەزەڭىندە اۋىل شارۋاشىلىعى تەحنيكاسى دوڭگەلەكتەرىن وندىرە باستايدى.
زاۋىتتىڭ جوبالىق قۋاتى جىلىنا 3,5 ميلليون دوڭگەلەك شىعارۋعا ەسەپتەلگەن. قازىرگى كەزدە زاۋىت سەرىكتەستەرىمەن بىرلەسىپ، وزىنە قاجەتتى مامانداردى دايارلاۋعا كىرىسكەن. ساران گۋمانيتارلىق- تەحنيكالىق كوللەدجىندە 68 ادام «رەزينا تەحنيكالىق بۇيىمدار» جانە «شينا ءوندىرىسى» ماماندىعىن يگەرۋدى باستادى.
ال قۇرىلىسى ەكى جىلدان كەيىن اياقتالۋعا ءتيىس «Silk Road Electronics» زاۋىتى جىل سايىن تەلەديدار، ەلەكتر سۋجىلىتقىش، شاڭسورعىش، اس ءۇي پليتاسى مەن جەلدەتكىش سەكىلدى تۇرمىستىق تەحنيكالاردى شىعارادى.
زاۋىتتىڭ بولاشاق ونىمدەرى قويىلعان شاعىن كورمەنى ارالاپ شىققاننان كەيىن مەملەكەت باسشىسى زاۋىت باسشىلىعىمەن اڭگىمەلەستى.