جاستارعا ارنالعان جاڭا مەملەكەتتىك سىيلىق پايدا بولادى

استانا. قازاقپارات - «دالا داۋىسى» ۇلتتىق سىيلىعىنىڭ قورىتىندىسى جەلتوقسان ايىندا شىعارىلادى. بۇل تۋرالى مادەنيەت جانە سپورت ۆيتسە-ءمينيسترى نۇرعيسا داۋەشوۆ ءمالىم ەتتى، دەپ حابارلايدى قازاقپارات ءتىلشىسى.

«سونداي-اق جازۋشىلار مەن دراماتۋرگتەرگە بەرىلەتىن «ايبوز» سىيلىعى بار. قازىرگى تاڭدا وعان ىرىكتەۋ ءجۇرىپ جاتىر. ال كومپوزيتورلاردى قولداۋ ماقساتىمەن «دالا داۋىسى» جوباسى قولعا الىندى. ول بايقاۋ جەلتوقسان ايىندا مارەسىنە جەتەدى. مۇندا دا وپەرا جانرىندا، حالىق اسپاپتارىندا تىڭ تۋىندىلار جازىپ جۇرگەن سازگەرلەر ماراپاتتالادى. «رەسپۋبليكا ءانى» اتتى ەسترادالىق اندەر جۇلدەسى تاعايىندالعان. وسى سىيلىقتار ارقىلى ءبىز ونەردىڭ ءاربىر سالاسىن قامتۋدى كوزدەدىك. اۋقىمى ۇلكەن بولعاندىقتان «iUma»، «ايبوز»، «دالا داۋىسى» سياقتى بىرنەشە تاقىرىپقا ءبولىپ وتىرمىز»، - دەدى ءمينيستردىڭ ورىنباسارى.

ونىڭ ايتۋىنشا، كەلەر جىلى مادەنيەت سالاسىنداعى جاستاردى قولداۋعا ارنالعان جاڭا سىيلىق تاعايىندالماق.

«كەلەسى جىلى پرەزيدەنت قاسىم-جومارت كەمەل ۇلىنىڭ تاپسىرماسىمەن جاستاردىڭ مەملەكەتتىك سىيلىعى تاعايىندالادى. ول 2023-جىلدان باستاپ بەرىلەدى»، - دەدى نۇرعيسا داۋەشوۆ.